Kryetari i Prishtinës, Përparim Rama, ka shprehur ngushëllimet e tij pas ndarjes nga jeta të Frank Wisner, të cilin e ka cilësuar një figurë të shquar të diplomacisë ndërkombëtare dhe mik të shtrenjtë të Kosovës
Ai ka thënë se Wisner ka luajtur një rol të jashtëzakonshëm gjatë periudhës së luftës dhe pas-luftës në Kosovë, duke mbështetur procesin e pavarësisë dhe aspiratat për një të ardhme demokratike të vendit. Sipas të parit të Prishtinës, Wisner ishte një nga mbështetësit kryesorë të ndërhyrjes së NATO-s për të ndaluar gjenocidin ndaj shqiptarëve të Kosovës dhe kontribuoi në rindërtimin dhe stabilizimin e Kosovës pas luftës.
Rama ka theksuar se angazhimi i Wisner ishte i pashoq dhe se ai gjithmonë ka qenë i gatshëm të ofronte këshilla për zhvillimin e vendit. Ai ka thënë: “Kosova ka humbur një mik të vërtetë, një njeri që kuptoi thelbin e paqes dhe rëndësinë e të drejtës ndërkombëtare.”
Kryetari i Prishtinës ka shprehur ngushëllime për familjen dhe miqtë e Wisner, duke shtuar se roli i tij do të mbahet mend për gjithmonë.
