Mësimdhënësja njëherësh edhe poetja e njohur Pranvera Qerimi, bashkë me nxënësit e saj kanë punuar portretin e Besarta Jasharit dhe ia kanë dhuruar asaj. Një punë e palodhshme është bërë nga duar e arta të nxënësve në shenjë respekti ndaj vajzës heroit të kombit.
Se si ka ardhur kjo ide dhe si e kanë realizuar në vijim do të keni mundësi të lexoni intervistën e shkurtër me shkrim që realizuam me Pranverën.
F.Bajraj: Nga ka lindur ideja për një portret të tillë?
P.Qerimi: Ideja lindi nga vetë unë pas vizitës që bëra te Nënë Ferdonija në Gjakovë, ku përjetova tmerret e luftës nga forcat serbe. E frymëzuar nga ky takim vendosa të realizojë një portret të Besarta Jasharit, me qëllim që nxënësit të mësojnë sa më shumë për historinë dhe sakrificën e popullit shqiptar.
F.Bajraj: Sa kohë iu është dashur ta realizoni?
P.Qerimi: Procesi i punës për portretin zgjati afërsisht dy deri në tre javë dhe u prit jashtëzakonisht mirë.
F.Bajraj: Si është pritur nga vet ajo dhe të tjerët?
P.Qerimi: Besarta Jashari e emocionuar nga kjo iniciativë shprehu kënaqësinë e saj për faktin që brezat e rinj po rriten me frymën e edukimit dhe atdhedashurisë.
“Nuk është rastësi që zgjodha shkollën tuaj. Pranvera kur më tregoi këtë punim e pashë punën e mrekullueshme që fëmijët e shkollës kishin bërë dhe u ndjeva shumë mirë. Prandaj pranova me kënaqësi të vij ta marrë dhe të jem e nderuar në mesin tuaj” – është shprehur Jashari.
Mësimdhënësja Pranvera Qerimi ashtu siç i dhuroi Nënë Ferdonijes revistën “Uji” e botuar në çdo stinë nga Shtëpia Botuese “Frymëzimi”, ku ishte shkruar një poezi kushtuar asaj, veproi në të njëjtën mënyrë edhe me Besarta Jasharin. Edhe asaj i dhuroi të njëjtën revistë ku ishte përfshirë një poezi dedikuar asaj.
