Deputetja e LDK-së, Hykmete Bajrami, ka thënë se punësimet e 220 punëtorëve të rinj në KEK dhe pjesëmarrjen e kryeministri Albin Kurti në këtë ceremoni ku shpërndau kartelat për ata, është keqpërdorim i ndërmarrjeve publike për blerje votash dhe tha se kjo përbën edhe shkelje ligjore, raporton Ekonomia Online.
Bajrami thekson se kjo ishte një përpjekje e pastër për të fituar mbështetje elektorale me metoda të paligjshme.
“Ligji për Ndërmarrje Publike, thotë se nuk mund të bëhesh drejtor në ndërmarrje publike nëse në 36 muajt e fundit ke mbajtur ndonjë post politik. Ndërsa, Albin Kurti, duke qenë kryeministër i vendit, për një çast jo vetëm që ushtroi pozitën e drejtorit të KEK-ut, por edhe atë të drejtorit të burimeve njerëzore. Kjo është shkelje ligjore – ky është keqpërdorim i ndërmarrjeve publike për blerje votash. Para dy ditësh në KEK, Kurti shpërndau 220 kontrata punësimi, duke e shndërruar një ndërmarrje publike në instrument të fushatës së tij zgjedhore. Këto punësime, të maskuara si “në funksion të mihjes dhe prodhimit të qymyrit” siç e tha ai vetë, janë asgjë më shumë se një përpjekje e pastër për të fituar mbështetje elektorale me metoda të paligjshme – komplet të paligjshme”, ka shkruar ajo.
Bajrami ka folur edhe për hapjen konkursit në SHSKUK.
“Dhe manipulimi vazhdon! Drejtori i SHSKUK-së, para katër ditësh paralajmëroi hapjen e një konkursi për 370 pozita që kanë qenë të mbajtura nga ushtrues detyre për më shumë se 10 vite. Pyetja është: Pse këto pozita u ruajtën për kaq gjatë dhe po shpallen pikërisht tani, në prag të zgjedhjeve?”, thotë ajo mes tjerash në këtë postim në Facebook.
