Intervistoi për Gazetën Frymëzimi: Fatijona Bajraj
F.Bajraj: Prej nga rrodhi nevoja për një koalicion të tillë?
I.Topanica: Është konteksti aktual ai që e kushtëzoi lindjen e një entiteti të ri. Përmbushja e zbrazëtisë që e ka krijuar mungesa e së djathtës së mirëfilltë në skenën politike në Kosovë, qe një nevojë emergjente. Më saktë, meqë partia në pushtet provoi me zell t’i shtynte përpara disa agjenda me të cilat sot identifikohet e majta, u deshtë të mobilizoheshim për t’iu kundërpërgjigjur me një gjuhë demokratike këtyre tendencave.
F.Bajraj: Pse e keni emëruar si të tillë “Koalicioni për Familje”?
I.Topanica: Koalicioni për Familjen është një emërtim që na identifikon me kauzën tonë. Po cila është ajo në të vërtetë do të pyesnit ju? Së pari, koncepti ‘Familje’ është vjelë nga tabani kulturor i yni, përkatësisht nga vetë tradita. E çfarë nënkupton ‘traditë’ me këtë rast? Asgjëmangut se sa një varg vlerash të trashëguara brez pas brezi, në kuptimin e pasurive shpirtërore, pikëpamjeve, zakoneve, virtyteve etj., që janë formuar historikisht në jetën e popullit tonë, ndërsa ruhen e zhvillohen më tej. Për këtë arsye familja zë vend qendror në diskursin tonë politik.
E dikë mund ta shtyjë edhe më tutje kureshtja duke e shtruar pyetjen: cilat janë ato vlera tradicionale? Po ja: roli i prindërve në raport me fëmijët, përgjegjësia e tyre në lidhje me edukimin; ruajtja e familjes tradicionale, respektivisht martesa ndërmjet një burri dhe një gruaje si modeli i vetëm i pranuar për kulturën tonë; respekti ndaj të moshuarve; ruajtja e lidhjeve të ngushta familjare e farefisnore; nderi dhe besa; feja; traditat kombëtare etj.
Dua të them, është një fondament kulturor prej të cilit është mbirë dhe rritur ideja për kauzën, terrenin e së cilit ne duam ta mbrojmë me çdo kusht.
F.Bajraj: Cilat janë pritjet tuaja në raport sa i përket votimit?
I.Topanica: Qëllimet tona nuk përfundojnë te disa ulëse në parlament. Në qoftë se vizioni ynë do të ishte kaq dritëshkurtër, atëherë kauza do të mund të cilësohej si e dështuar që në krye të herës. Përtej rezultateve që synojmë t’i korrim në kuptimin praktik, duam të jemi ata që do t’i dhënë fund tranzicionit socio-kulturor, se atij formal politik ia kemi shkruar epilogun. Por ky fund, nuk duhet të ketë efekte anësore sa të na i fshijë nga kujtesa kolektive vlerat që i përmendëm më sipër.
F.Bajraj: Pse duhet një qytetar i Kosovës ta votoj koalicionin tuaj?
I.Topanica: Votuesi ynë, e di pse do të na votojë. Qëllimet tona, pikëpamjet tona, programi ynë etj., i kemi bërë të qarta. Pra, ai do të na votojë sepse është kundër agjendave që duan ta shpërfytyrojnë identitetin, të na e tjetërsojnë rolin e prindërve, t’i përdhosë të shenjtat tona që i kanë bazat te tradita, te feja, te zakonet.
Pastaj, idetë tona për zhvillim ekonomik, për reforma në shëndetësi, për ngritje të cilësisë në sistemin arsimor etj., janë të kristalizuara.
Mbi të gjitha, do të na votojë sepse e kemi prezantuar një listë kandidatësh me emra të dëshmuar në fusha të ndryshme, listë kjo e cila është e kombinuar me të tjerë që kanë eksperiencë në politikë.
Ideali ynë ka të bëjë me ngritjen e vendit në një tjetër stad: në një shtet të fortë, ku ka rend dhe ligj, me një ekonomi stabile, me një sistem arsimi që nxjerr breza të arsimuar, me një sistem shëndetësor të avancuar etj, etj.
F.Bajraj: Në fund të mandatit tuaj si do të jetë gjendja në Kosovë sipas planit që ju keni hartuar dhe do ta zbatoni?
I.Topanica: Këto ditë, diku në rrjetet sociale, hasa në një video ku shihej një person tek mbante një fjalim përpara një turme. Oratori thoshte:
«Tri janë shtyllat, shembja e të cilave, do të thoshte edhe rrënim i një shoqërie: zvetënimi i modelit të cilin e ndjek ajo shoqëri; degradim i sistemit arsimor; dhe shthurja e familjes si koncept tradicional.»
Ai vijoi me shtjellimin e kësaj teme, por mua mendja më ngeli te theksi që ra mbi familjen si nocion dhe konstatova me vete, se procesi i rrënimit te ne, ka ngelur te pika e fundit.
Shihni, jo vetëm politikani, por edhe mësuesi, mjeku, avokati, nëpunësi, polici etj., e kanë humbur vlerën e dikurshme si profesione. Pyetni këdo që ta hasni në rrugë, në cilindo cep të Kosovës se çfarë mendon për politikanin, avokatin apo mjekun, përgjigjet do të jenë negative.
Në anën tjetër, përmbysja e vlerave ka nxjerr në pah modele të këqija të cilët i ndjek sot shoqëria. Kësisoj, më shumë vëmendje marrin maniakët seksualë, të sëmurët mendorë, të pafytyrët, skandalozët e plot të tjerë që ekspozohen ekraneve televizive, se sa ata që i ushtrojnë profesionet e lartcekura.
Sistemi arsimor, po ashtu, vuan prej problemeve të shumta, prandaj them se ka ngelur vetëm çështja e familjes të mbrohet, me çdo kusht, me çdo mjet.
Për këtë, uroj që ne të shndërrohemi në katalizator të ndryshimeve për të mirë, një forcë që e çon shoqërinë në një stad tjetër emancipimi.
F.Bajraj: Çka humbë Kosova nëse nuk do të jeni ju pjesë e Kuvendit dhe politikës në vend?
I.Topanica: Një klasë të re politikanësh që vijnë prej sferave të ndryshme, ndërsa kanë histori suksesi. Një kauzë, jetësimi i së cilës do të nënkuptonte edhe jetësim i emancipimit dhe forcimit të shoqërisë; dhe një ofertë që buron nga ideologjia e së djathtës, krejt e munguar dekadave të fundit.
F.Bajraj: A mendoni se do t’i arrini të vetëm (pa koalicione me parti të tjera) idetë dhe konceptrt tuaja politike?
I.Topanica: Të gjithë ata që janë rreshtuar krah nesh në këtë fazë delikate politike, na kanë ndihmuar shumë. Ata që do të na bashkohen nesër, janë po ashtu, të mirëseardhur. Gjithsesi, kauzat politike nuk duhet projektuar mbi individë apo grupe politike. Vizioni ynë, duhet të zhvillohet edhe pas nesh.
Qëllimi ynë është t’ua lëmë trashëgim brezave në vijim një shtëpi politike në të cilën ruhen dhe kultivohen vlerat e mirëfillta.
Imer Topanica
#KoalicioniperFamiljen
#23
