Intervistë me autoren: Hyrë Fazlija
Intervistoi për Gazetën Frymëzimi: Fatijona Bajraj
Biografia e të intervistuarit/es
E lindur në vitin 1968, në fshatin Dujakë, Gjakovë. Shkollën fillore ka kryer në Skivjan, të mesmen në Deçan, ndërsa ShLP në Gjakovë. Programin e AKM-së Letërsi e gjuhë shqipe, në Prizren. Ka punuar mësimdhënëse e Gjuhës shqipe për 16 vite. Fillimisht në fshatin tim të lindjes pastaj në ShFMU “ Rilindja”- Dobrigje. Tani ka mandatin e dytë drejtoreshë e së njëjtës shkollë. Ka të botuar librin e parë “ Simfonia e Stinëve” Mars 2024.
F.Bajraj: Na flisni pak për fillet e karrierës suaj kur keni filluar të merreni pikërisht me letërsi?
H.Fazlija: Pjesa më e madhe e neve që shkruajmë, themi që kam filluar të shkruaj që në shkollën fillore. Zatën, aty janë ndezur shkëndijat e ndonjë vargu, jo të rregullt, por synues ( premtues për veten).Personalisht, vitet e gjimnazit kanë qenë frymëzuese për mua, me akordim vargu, e pastaj koha e studimeve më shumë e lakuar vargjeve, të gjetura dhe me më shumë brendësi poetike.
F.Bajraj: Pse bash poezia?
H.Fazlija: Poezia?! Fillimisht kam shkruar prozë, veçmas sociale ngase e ndieja, sikur mendimi i të shprehurit, shtrihej në një vijë më horizontale: Mund ta koordinoja në një prizëm tjetër. Kjo ngase, kam shkruar edhe lloje të letrave të kohës, që ishin mjeti i vetëm i komunikimit.
Tani, poezia. Në pak, përmbledhë shumë. Është më shpirtërore, e brendshme, e lexuar dhe ajo ku gjej frymëzimin.
F.Bajraj: A mendoni që e keni arritur kulmin e karrierës suaj?
H.Fazlija: Jo. Karriera është vazhduese, pavarësisht qasjeve të shumta ku ndihesh e ngritur dhe vlerësohesh. Pika kulminante nuk ekziston. Secili nga ne synon të jap më të arrirën për muzën, lexuesin, dhe, derisa është në këtë kërkim, do të thotë që vrapon pas kulmit të karrierës, që e quani ju.
F.Bajraj: A kujtoni ndonjë kohë kur mendoni se keni dështuar në këtë fushë?
H.Fazlija: Jeta ka peripetitë e saja, që ndodh të të lodhë, të të thyen dhe të pamundëson ose të pengon të ndjehesh e padështuar. Por, janë periudha që nuk zgjasin, dhe ti domosdo gjen rikthimin.
F.Bajraj: Sa e keni pas të vështirë dhe sfiduese të jeni këtu ku jeni sot?
H.Fazlija: Të jetosh në një mjedis ( sot për sot), të ndryshëm nga bota jote, është më e vështira që mund të thuhet. Jo të gjithë merren me poezi dhe prozë, jo të gjithë të shohin me sy poeti, dhe , këta jo të gjithë (që janë më shumë se ti), të vënë para vështirësive (pjesa më e madhe) deri në paragjykim të asaj që ti shpreh poetikisht, kur e ndien. Personalisht, i kam sfiduar me thënien time: Lëreni poetin të qajë!
F.Bajraj: Me çka merreni jashtë kësaj, keni ndonjë profesion tjetër?
H.Fazlija: Nga sa u tha edhe më lartë, me profesion jam mësimdhënëse për Letërsi dhe gjuhë shqipe. Është profesioni më i dëshiruar, prej të cilit mund të japësh shumë nga vetja, profesionalisht, por edhe të marrësh, pse jo frymëzim.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
H.Fazlija: Gjuhëtarët, flas për vete, “ nuk dine të bëjnë punë tjetër”, përveç arsimit, ndërsa kushtimisht them, poetët vdesin me poezinë. E ardhmja është enigmë, por nuk besoj t’i përkushtohem ndonjë fushe tjetër, leximit dhe hulumtimit, vazhdimisht po, kuptohet.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
H.Fazlija: Ndoshta të thuash koment, për një temë të gjerë është sikur të ngritësh dorën ose jo për një (mos) miratim. Mendoj që ka një ngutje të daljes në skenë, të shumëdëshiruar, por që duhet vlerësuar, kritikuar dhe përkrahur. Këtë trekëndësh duhet ndjekur kreu i letërsisë në Kosovë.
F.Bajraj: Planet e juaja që do t’i realizoni së shpejti?
H.Fazlija: Plan i vonuar, por i realizuar, marsin e 2024-es, kam dalur me librin “Simfonia e Stinëve”. Paksa me eufori, kam mjaftueshëm krijime për librin e dytë, por njohësit e letërsisë së mirëfilltë, më kanë sugjeruar, që t’mos botoj dy libra brenda një viti le të frymojë e para prandaj.
Do të dal me librin e dytë, pse jo ndoshta në tremujorin e pare të vitit kalendarik.
F.Bajraj: Si e shihni Kosovën pas 10 vitesh në fushën e letërsisë?
H.Fazlija: Nëse Kosovës do t’i shtohen zërat kritik të letërsisë, vlerësuesit e denjë ( të paanshëm) dhe përkatës për ata/ato, që kanë motive dhe frymë për t’i dhënë letërsisë në Kosovë, s’do mend që lexuesi do të jetë vërtetë lexues, jo shikues.
