Intervistë me poeten: Selvete Dervishi-Nimani
Intervistoi për Gazetën Frymëzimi: Fatijona Bajraj
F.Bajraj: Na flisni pak për fillet e karrierës suaj, kur keni filluar të merreni pikërisht me letërsi? Pse bash poezia?
S.Dervishi-Nimani: Nuk do ta quaja karrierë , por mund të themi se interesimi im për librin dhe shkrimet filluan qysh nga shkolla fillore .Poezia është ajo që ma ka përmbushur atë boshllëkun që kam ndjerë për të thënë të pa thënat dhe kjo është arsyeja që unë fillova me poezinë.
F.Bajraj: A mendoni që e keni arritur kulmin e karrierës suaj?
S.Dervishi-Nimani: Në letërsi nuk ka kufi të caktuar për të pasur një kulm të karrierës pavarësisht se sa ke korrur suksese gjatë rrugëtimit. Unë kam edhe shumë punë për të bërë, por shpresoj qe do ia dalë me ndihmën e zotit.
F.Bajraj: A kujtoni ndonjë kohë kur mendoni se keni dështuar në këtë fushë?
S.Dervishi-Nimani: Nuk do ta quaj dështim , por gjatë rrugës kam pasur një lloj hezitimi, sepse rrugëtimin tim e stërgjata paksa ,ku neglizhenca ime rezultoi edhe me vonesën e botimit të librit tim. Kur diçka bëhet me shumë dashuri dhe mund, dështimi nuk zë vend aspak.
F.Bajraj: Sa e keni pasur të vështirë dhe sfiduese të jeni këtu ku jeni sot?
S.Dervishi-Nimani: Bota nuk është një fushë me lule, këtë e dimë të gjithë i ka edhe gjembat që duhet kaluar, por me rëndësi është të arrish qëllimin për ku je nisur. Prandaj i ka ato sfidat dhe vështirësitë e veta për të vazhduar drejt sukseseve.
F.Bajraj: Me çka merreni jashtë kësaj, keni ndonjë profesion tjetër?
S.Dervishi-Nimani: Nuk do të ndalesha në një profesion të caktuar, duke pasur parasysh që përkushtimin tim kam vendosur ta kem për familjen veçanërisht për fëmijët e mi, duke i parë rrethanat e jetës mendoj që si nënë e tre fëmijëve kam përgjegjësi në rritjen dhe edukimin e tyre. Besoj që ia vlen dhe për këtë jam shumë krenare me veten time.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
S.Dervishi-Nimani: Nuk mund të flas shumë rreth kësaj duke pasur parasysh që jeta është me atë petkun e mbuluar sa i përket së ardhmes.
Për mua jeta është lojë shumë e fortë dhe kurrë nuk i dihet nga cila anë shkon topi pavarësisht se sa je lojtar i mirë.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
S.Dervishi-Nimani: Gjendja e letërsisë në Kosovë për fat të keq nuk është aq për tu dëshiruar ,me keqardhje e them se në tjetrën anë mungon edhe lexuesi i cili duhej të ishte edhe kritikuesi më i madh ne këtë fushë, ndoshta edhe rrjetet sociale e bëjnë të veten në kuptimin negativ duke i mbajtur lexuesit larg librit, gjë e cila do të ketë pasoja te gjeneratat e reja në vazhdim e që dëmi do të jetë i madh .
F.Bajraj: Planet e juaja që do t’i realizoni së shpejti?
S.Dervishi-Nimani: Të them të drejtën jam duke punuar intensivisht për librin e dytë i cili për veç poezive do të ketë edhe prozë. Dashtë zoti ta kem shëndetin për të vazhduar edhe me botimin të librave të tjerë.
F.Bajraj: Si e shihni Kosovën pas 10 vitesh në fushën e letërsisë?
S.Dervishi-Nimani: Dua të jem optimiste sa i përket fushës së letërsisë në vendin tonë duke parë shumë talentë të rijnë që e tregojnë talentin e tyre duke krijuar një përshtypje që vendi jonë do të jetë shumë më mirë në këtë fushë në vitet e ardhshme, ku shpresoj që edhe mbështetja institucionale do të jetë me e madhe që për fat të keq sot mungon, ndoshta kjo është edhe një ndër arsyet kryesore që ka humbur interesimi për librin, e që nuk është aspak në favorin tonë si popull i lashtë qe jemi.
