Intervistë me autorin: Maxhun Osmanaj
Intervistoi për Gazetën Frymëzimi: Fatijona Bajraj
F.Bajraj: Na flisni pak për fillet e karrierës suaj, kur keni filluar të merreni pikërisht me letërsi? Pse bash poezia?
M.Osmanaj: Letërsia në fillet e hershme tek unë ka filluar pak me drojë, pak me frikë, por edhe me një entuziazëm në shpirt dhe dashni prej një maturanti i veshur me ëndrra jetësore, që nga viti 1977 në revistën letrare “Pionieri”.
F.Bajraj: A mendoni që e keni arritur kulmin e karierës suaj?
M.Osmanaj: Mendoj që asnjë shkrimtar nuk pajtohet me atë që ka arritur kulmin e karrierës. As unë nuk kam arritur ndonjë kulm që pajtohem se preka majat, meqë jam në udhëtim letrar dhe përpiqem t’i përparoj format e shprehjes poetike, stilin, figuracionin, si dhe ndërtimin strukturor të prozës.
F.Bajraj: A kujtoni ndonjë kohë kur mendoni se keni dështuar në këtë fushë?
M.Osmanaj: Dështim e kuptoj kur nuk shkruaj, kur nuk botoj, dhe kur nuk lexohem, nëse shkruaj si dhe nuk përcillem nga kritika letrare. Unë këtë nuk e kam përjetuar , meqë ende kam çka për të thënë.
F.Bajraj: Sa e keni pasur të vështirë dhe sfiduese të jeni këtu ku jeni sot?
M.Osmanaj: Sfidat janë të pranishme në çdo fushë jete, por meqë letërsia fillon si personale, më vonë bëhet pjesë kolektive e shoqërisë dhe krijon një harmoni shpirtërore në çdo çast atëherë pajtohesh me sfida, meqë letërsia të merr kohë , por edhe të dhuron një lumturi të pashpjeguar. Përballë stuhive jetësore gjatë udhëtimit letrar falë energjisë dhe dashurisë për jetën, mendoj se kam dalë fitimtar.
F.Bajraj: Me çka merreni jashtë kësaj, keni ndonjë profesion tjetër?
M.Osmanaj: Profesioni im në jetë ishte mësimdhënia, afër tri dekada, ndërsa tani i përkushtohem tërësisht letërsisë, leximit, shkrimit, shëtitjes, ecjes, si dhe një gjimnastike të shkurtër në çdo mëngjes.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër.
M.Osmanaj: Jo, por në zhanre të ndryshme, po. Letërsinë e kam pasion. Unë kam të botuara 10 libra për fëmijë në prozë e poezi. Ashtu kam të botuar libra në poezi dhe në prozë për të rritur, pra krejt deri më tani ,14 libra. Aktiviteti im vazhdon në revistën letrare ‘’Zog mëngjesi’’, si dhe në Lidhjen e Shkrimtarëve të Kosovës. Herë pas herë merrem me vështrime letrare.
F.Bajraj: Çfarë komenti keni lidhur me gjendjen e letërsisë në Kosovë?
M.Osmanaj: Letërsia në Kosovë ka pena të mira, sado që trumbetohet se s’ka letërsi të arrirë, por ka edhe botime të mesme apo të dobëta. Fjalën e ka kritika letrare.
F.Bajraj: Planet e juaja që do t’i realizoni se shpejti?
M.Osmanaj: Kam përpara disa vepra për botim në disa zhanre, poezi, prozë, kritikë letrare…Por s’do të ngutem…
F.Bajraj: Si e shihni Kosovën pas 10 vitesh në fushën e letërsisë?
M.Osmanaj: Askush s’mud të parashikojë, meqë teknologjia dhe inteligjenca artificiale erdhën dhe të shohim, por libri besoj se do të ngadhënjejë. Libri dhe leximi janë drita të shpirtit. Besoj që libri fizik do të dalë fitimtar ndaj këtyre erozioneve teknologjike.
