Intervistoi për Gazetën Frymëzimi: Ferdane Sahiti
Drita Fejza: Kam lindur në një fshat të bukur, i njohur si “Fshati i bilbilave,” dhe aktualisht jetoj e punoj në Berlin. Jam e specializuar në shërbime mediatike për informim, përkthyese gjuhësore, ndërmjetëse për integrim, si dhe këshilltare sistemike. Kam kontribuar në disa antologji poetike dhe kam botuar disa libra, ndër më të rëndësishmit janë:
• Migranten Geschichte, autore e tri poezive në gjuhën gjermane
Në shqip
• Shpirti i arratisur
• Melodia e Pyllit
• Triumf dashurie
• Dritëhijet e fatit
• Me mallin e një balade
F.Sahiti: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia
Drita Fejza: Fillimet e karrierës sime ishin të lidhura me botimet e para në “Pioneri,” që për mua, si fëmijë, ishin një arritje e madhe. Arti të jep ndjesinë se nuk je vetëm. Kam qenë gjithmonë pak rebele dhe më pëlqen të luaj me fjalët. Poezia është mjeti im më i fuqishëm për të shprehur këtë liri.
F.Sahiti: A mendoni që e keni arritur kulmin e karrierës suaj?
Drita Fejza: Nuk besoj se ekziston një kulm i vetëm në karrierë. Çdo sukses është thjesht një hap përpara në një udhëtim më të gjatë e të vazhdueshëm.
F.Sahiti: A kujtoni ndonjë kohë kur mendoni se keni dështuar në këtë fushë?
Drita Fejza: Sa i përket dështimeve, nuk di kë të quaj dështim; nuk i shoh zhgënjimet si humbje, edhe pse ato kanë lënë gjurmë të thella në jetën time. Ato më kanë mësuar të ringrihem dhe të fokusohem te gjërat që kanë vërtet rëndësi.
F.Sahiti: Sa e keni pas të vështirë dhe sfiduese të jeni këtu ku jeni sot?
Rruga ime nuk ka qenë aspak e lehtë, por më ka mësuar të qëndroj e fokusuar te ato gjëra që më përmbushin më shumë.
F.Sahiti: Me çka mirreni jashtë kësaj, keni ndonjë profesion tjetër?
Drita Fejza: Përveç letërsisë, kam angazhime të tjera, por letërsia mbetet në qendër të jetës sime.
F.Sahiti: A do të ju shohim mbase në një të ardhme të afërt në ndonjë fushë krejtësisht tjetër?
Drita Fejza: E ardhmja është e mbushur me mundësi. Nuk përjashtoj asgjë, sepse jeta gjithmonë ofron shtigje të reja, dhe unë e pëlqej eksplorimin.
F.Sahiti: Çfarë komenti keni lidhur me gjendjen e letërsisë në përgjithësi në Kosovë dhe Shqipëri?
Drita Fejza: Letërsia në Kosovë po përjeton një zhvillim të vazhdueshëm. Ka shumë zëra të rinj e të talentuar, dhe unë besoj se kjo rritje do të vazhdojë.
F.Sahiti: Planet e juaja që do t’i realizoni së shpejti?
Drita Fejza: E pëlqej të jem e përpiktë, por më pëlqen gjithashtu spontaniteti; natyrshmëria më shijon më shumë. Ju thotë gjë kjo fjali: “Njeriu bën plane, Zoti qesh.” Jam e hapur ndaj mundësive të reja që mund të shfaqen në rrugën time.
F.Sahiti: Si e shihni Kosovën dhe Shqipërinë pas 10 vitesh në fushën e letërsisë?
Drita Fejza: Shpresoj që në dekadën e ardhshme letërsia shqiptare të ketë një zë të fortë në skenën ndërkombëtare, me më shumë shkrimtarë të mirëfilltë dhe lexues të përkushtuar.
