Intervistë me poeten: Fatjana Povataj
Intervistoi për Gazetën Frymëzimi: Fatijona Bajraj
F.Bajraj: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia?
F.Povataj: Nuk e di nëse ende kam ndërtuar sado pak karrierë, por fillet e letërsisë në mua kanë nisur që e vogël. E mbaj mend vetën në shkollën fillore, pastaj në të mesmen që vazhdimisht lidhur me çdo temë kam shkruar dhe kam krijuar shkrimet e mia, asnjëherë nuk kam preferuar t’i marrë diku tjetër (në ndonjë burim). Unë nuk merrem me poezi, por kryesisht me prozë dhe me shkrime të gjata. Preferoj të trajtoj gjërat në detaje.
F.Bajraj: A mendoni që e keni arritur kulmin e karrierës suaj?
F.Povataj: Jo. Unë ende jam në fazat fillestare dhe kam shumë punë për të bërë e më pret një rrugë e gjatë përpara vetës.
F.Bajraj: A kujtoni ndonjë kohë kur mendoni se keni dështuar në këtë fushë?
F.Povataj: Realisht, ata që merren me krijimtari e dijnë që idetë rrjedhin në momente të papritura. Nuk mund të them se ka qenë një kohë e caktuar kur e kam përjetuar dështimin, por ka ditë ose periudha që nuk kam ide ashtu siç i dua unë.
F.Bajraj: Sa e keni pas të vështirë dhe sfiduese të jeni këtu ku jeni sot?
F.Povataj: Sfidat janë të pranishme gjithmonë kur jemi në arritje të qëllimeve. Patjetër që kam pasur edhe unë diçka të tillë duke hasur në persona që nuk e kanë vlerësuar punën time ose që e kanë hedhur poshtë mundin tim, por gjithsesi ka pasur edhe të tjerë që më kanë mbështetur, gjë për të cilën jam shumë mirënjohëse.
F.Bajraj: Me çka merreni jashtë kësaj, keni ndonjë profesion tjetër?
F.Povataj: Unë kam studiuar për të punuar në fushën e arsimit, gjë e cila është puna ime primare. Por, asnjëherë nuk e kam lënë shkrimin pas dore. Gjithmonë mundohem t’i balancoj të dyja.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
F.Povataj: Nuk e di, nuk mund të jap një përgjigje të saktë rreth kësaj, por me shumë gjasë nuk do të jem duke u marrë me diçka që nuk ka të bëjë me pasionet e mia.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
F.Povataj: Rruga drejt letërsisë mendoj që nuk është asnjëherë e mjaftueshme. Letërsia në vendin tonë ka njerëz shumë, por vlerësimi rreth saj është i mangët. Shkrimtarët nuk kanë mbështetje institucionale, sepse sot po kërkohen profesione të tjera më fitimprurëse.
F.Bajraj: Planet e juaja që do t’i realizoni së shpejti?
F.Povataj: Besoj që në të ardhmën e afërt do të botoj librin tim të parë për të cilin kam filluar të punoj, por dua që gjithçka të shihet atëherë kur realizimi të përfundoj. Shpresoj të jetë diçka e bukur për ata që e duan leximin dhe historitë e njerëzve që nuk dorëzohen.
F.Bajraj: Si e shihni Kosovën pas 10 vitesh në fushën e letërsisë?
F.Povataj: Nëse punimet e atyre që e duan artin vazhdojnë me një vrull të tillë, padiskutim besoj që brenda një kohe të shkurtër Kosova do të ketë letërsinë në një pozitë më të mirë se që është sot.
