Intervistë me poeten: Flora Halimi
Intervistoi për Gazetën Frymëzimi: Fatijona Bajraj
F.Bajraj: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia?
F.Halimi: Me letërsi kam filluar të merrem qysh në fillimet e shkollës së mesme, nisur nga kyçja në diskutime letrare ne orët e gjuhës shqipe, pastaj interesimi im u zgjerua në këtë fushë duke u inkuadruar ne klube lokale të letërsisë, me tutje poezitë e mia u publikuan ne revista letrare, gazeta elektrinoke dhe Antologji.
Në stilin letrar poezia është e preferuara ime ngase personalisht e përjetoj dhe ndjej më fuqishëm, por edhe natyra e saj me lë përshtypje ne aspektin racional te lexuarit mes rreshtave, zhvillimit te mendimit kritik.
F.Bajraj: A mendoni që e keni arritur kulmin e karrierës suaj?
F.Halimi: Arti letrar është një oqean i thellë e pambarim, ndonëse e re jam kyçur në këtë drejtim, konsideroj qe jam duke hyrë në një fazë të zhvillimit më profesional të letërsisë.
Mbetet shumë punë dhe angazhim për të ardhmen në krijimin e një karriere të pasur letrare.
F.Bajraj: A kujtoni ndonjë kohë kur mendoni se keni dështuar në këtë fushë?
F.Halimi: Dështimet kanë rrjedhur ne proces te berit art, por jo ne vendime.
Rrugëtimi im në letërsi ka qenë i larmishëm me uljet dhe ngritjet e veta, si zakonisht fillimet janë gjithmonë më sfiduese dhe me skeptike deri në gjetjen e asaj që të përmbush shpirtërisht dhe intelektualisht.
Megjithatë edhe dështimet në këtë fushë më kanë lënë një shije më të “ambël” për dallim nga uljet ne fusha tjera te angazhimit.
F.Bajraj: Sa e keni pas të vështirë dhe sfiduese të jeni këtu ku jeni sot?
F.Halimi: E vështirë mbase nuk ka qenë, por sfiduese është dhe vazhdon edhe me tutje, e them se nuk ka qenë e vështire sepse ka mundësi te llojllojshme për t’u afruar ne art nisur nga orët letrare, konkurset e klubet letrare.
Ndërsa sfiduese ka qenë depërtimi më i thellë, mbështetja morale dhe financiare që iu dhurohet të rinjve në art nga institucionet shtetërore relevante, të qënurit aktiv dhe atraktiv në opinionin, rrethin artistik dhe performancat artistike letrare.
F.Bajraj: Me çka merreni jashtë kësaj, keni ndonjë profesion tjetër?
F.Halimi: Krahas këtij angazhimi jam pothuajse gati në përfundim të studimeve themelore në Fakultetin Juridik në Universitetin e Prishtinës “Hasan Prishtina.”
Gjithashtu mundohem që kohë pas kohe të jem aktive në jetën publike konkretisht me angazhime në fushën e shoqërisë civile dhe projekteve vullnetare në interes të përgjithshëm të shoqërisë.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
F.Halimi: E ardhmja është mister më vete, pavarësisht caktimit të planeve dhe vizionit, por çka do qe sjell jeta si befasi e te papritur ne pjese e imja do jetë gjithmonë e lidhur për poezinë, jo për famë, reputacion apo te ardhura materiale, por vetëm me qëllimin që kjo më gdhend dhe ma përsos shpirtëroren.
Poezia më bënë njëri më të mirë dhe sot janë pothuajse në zhdukje gjerat që ndikojnë në përparimin etik dhe moral të njerëzve.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
F.Halimi: Ashtu si arti në përgjithësi edhe letërsia në Kosovë vlerësohet pak, punohet pak dhe nuk e ka përkrahjen e merituar nga gjitha instancat e shoqërisë.
Në anën tjetër ndikimi teknologjisë dhe përpjekja që përmes kësaj të fundit të bëhet art është kërcenim për cilësinë dhe perspektiven e letërsisë.
F.Bajraj: Planet e juaja që do t’i realizoni së shpejti?
F.Halimi: Synimi im është të realizoj një përmbledhje të poezive te mia, të marr pjesë edhe në konkurse letrare rajonale dhe më gjerë.
F.Bajraj: Si e shihni Kosovën pas 10 vitesh në fushën e letërsisë?
F.Halimi: Dua të jem optimiste, megjithatë në horizont ka pak sinjale që na e vërtetojnë këtë.
Uroj që pas një kohe arti letrar të aplikohet me seriozitet dhe përpikëri si një metode çlirimi e qetësimi shpirtëror dhe psikologjik kudo që jemi prezent.
