Intervistë me poetin: Blerton Arsllani
Intervistoi për Gazetën Frymëzimi: Fatijona Bajraj
F.Bajraj: Na folni pak për fillet e karrierës suaj, kur keni filluar të merreni pikërisht me
letërsi? Pse bash poezia?
B.Arsllani: Të them të drejtën, nuk më kujtohet pikërisht fillimi im në këtë rrugë, por e di që ka qenë kah fundi i shkollimit fillor, ndërsa në vitin e dytë të shkollimit të mesëm arrita të botoj librin tim të parë.
Sa i përket Poezisë, atë nuk e zgjodha unë por ajo më zgjodhi mua. Ende nuk mund t’a elaboroj se si arrita të hy në këtë botë. Më pëlqen të jem ithtar i kësaj rruge sepse poezia është kënga më e bukur e dhimbjes që prej në lashtësi.
F.Bajraj: A mendoni që e keni arritur kulmin e karrierës suaj?
B.Arsllani: Nuk mund t’i përgjigjem kësaj pyetje sepse kurrë nuk kam pasur si qëllim karrierën. Shkruaj vetëm sepse e dua atë.
F.Bajraj: A kujtoni ndonjë kohë kur mendoni se keni dështuar në këtë fushë?
B.Arsllani: Kjo botë nuk njeh dështim. Mund të ndodh që të futemi në rrugica pa dritë por pikërisht atëherë ndodh më e bukura, pikërisht atëherë hapen sytë e zemrës.
F.Bajraj: Sa e keni pas të vështirë dhe sfiduese të jeni këtu ku jeni sot?
B.Arsllani: E bukura e këtij rrugëtimi është pikërisht kjo, sepse herë na kthen në Poet që vështirësitë ti kthejmë në këngë, herë na shëndrron në piktorë që betejat t’i shëndrojmë në piktura të bukura, e herë nga ata ndërtohen skulptura…
F.Bajraj: Me çka mirreni jashtë kësaj, keni ndonjë profesion tjetër?
B.Arsllani: Normalisht që jashtë botës së shkrimit kam edhe profesionin tim të përditshëm. Krahas kësaj shkruaj edhe tekste këngësh, e njëkohësisht udhëheq edhe dy Organizata JQ.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
B.Arsllani: Nuk mund ti vendoj Pikë kësaj pyetje sepse nuk e di se çka është shkruar në librin e jetës sime. Mirëpo edi që Letrën dhe Lapsin nuk do t’i lë kurrë.
F.Bajraj: Çfarë komenti keni lidhur me gjendjen e letërsisë në përgjithësi në Kosovë dhe Shqipëri?
B.Arsllani: Në këtë drejtim fatkeqësisht jam shumë pesimist. Mendoj që liria e tepërt në të dhënën e të drejtës së botimeve, është një bombë në botën e letërsisë. Jam këmbëngulës në mendimin se duhet të krijohen komisione të cilët do të kontrollonin veprat para botimit, dhe ata të cilat do të kishin përmbajtje cilësore, të merrnin licencën e publikimit.
F.Bajraj: Planet e juaja që do t’i realizoni së shpejti?
B.Arsllani: Nuk kam vendosur diçka konkrete. Po punoj në librin tim të radhës si dhe disa videorecitale, por nuk e di se kur do të publikohen.
F.Bajraj: Si e shihni Kosovën dhe Shqipërinë pas 10 vitesh në fushën e letërsisë?
B.Arsllani: Është e vështirë t’i përgjigjesh kësaj pyete. Nuk di të jem optimist apo pesimist. Vendet tona kanë talente që jam i sigurt që do të arrinin majat e suksesit në botë, por për fat të keq mungon edhe përkrahja nga institucionet përkatëse. Njëkohësh po lidh këtë edhe me përgjigjen që dhashë më lartë: nga publikimet e tepërta nga çdokush, nuk arrijnë të dalin në dritë penat e arta.
Por duke u bazuar në historinë e vendit tonë, edi që letërsia ka qenë arma jonë më e fortë përball reve të errëta të botës. Andaj kam shpresë që Lasgush, Kadare e Agoll do të ketë gjithmonë.
