Ministria e Industrisë, Ndërmarrësisë dhe Tregtisë (MINT) ka njoftuar se ka marrë vendim për caktimin e çmimit të naftës dhe produkteve të saj.
Sipas këtij vendimi, marzha tregtare maksimale e lejuar për shitjen me shumicë është vendosur në 2 cent për litër, ndërsa për shitjen me pakicë është 12 cent për litër.
Në njoftimin e MINT-it thuhet: “Llogaritja e marzhës tregtare maksimale e lejuar për shitje me shumicë dhe pakicë bëhet sipas nenit 4, paragrafit 1.1 dhe 1.2 të Udhëzimit Administrativ Nr. 03/2022 Për Rregullimin e Çmimeve të Produkteve të Naftës dhe Karburanteve të Ripërtërishme dhe Masat e Tjera Mbrojtëse. Ky vendim hyn në fuqi nesër, më 4 gusht 2024, dhe do të mbetet në fuqi për tridhjetë (30) ditë.”
Gjithashtu, ministria ka bërë të ditur se mbikëqyrja e zbatimit të këtij vendimi do të kryhet nga Inspektorati Qendror i Tregut, në bashkëpunim me Doganën dhe Administratën Tatimore të Kosovës (ATK).
Njoftimi i plotë i MINT:
CAKTOHET MARZHA TREGTARE PËR PRODUKTET E NAFTËS DHE INTENSIFIKOHET MBIKQYRJA E CILËSISË DHE SASISË
Ministria e Industrisë, Ndërmarrësisë dhe Tregtisë (MINT), ka evidentuar mospërshtatje të çmimeve vendore të produkteve të naftës, në krahasim me lëvizjet e çmimeve në tregun botëror. Kjo evidencë rezulton nga monitorimi i rregullt i tregut të produkteve të naftës, raporti i Inspektoratit Qendror të Mbikëqyrjes së Tregut lidhur me çmimet e shitjes me pakicë të produkteve të naftës, si dhe njoftimet ditore të pranuara nga Dogana e Kosovës lidhur me çmimet e furnizimit/importit të produkteve të naftës. Evidenca në fjalë, sjell një bazë/shkas për rregullimin e çmimeve dhe caktimin e masave të tjera mbrojtëse.
Me qëllim mbrojtjen e konsumatorit, mbrojtjen e konkurrencës dhe për të mënjanuar çrregullimet në treg, MINT ka marrë vendim për caktimin e çmimit dhe masave tjera mbrojtëse të produkteve të naftës.
Sipas këtij vendimi marzha tregtare maksimale e lejuar e shitjes me shumicë është dy (2) euro centë për litër kurse marzha tregtare maksimale e lejuar e shitjes me pakicë është dymbëdhjetë (12) euro centë për litër.
Llogaritja e marzhës tregtare maksimale e lejuar për shitje me shumicë dhe pakicë bëhet sipas nenit 4 paragrafi 1.1 dhe 1.2. të U/A Nr. 03/2022 Për Rregullimin e Çmimeve të Produkteve të Naftës dhe Karburanteve të Ripërtërishme dhe Masat e Tjera Mbrojtëse.
Ky vendim hyn në fuqi nesër ( 04.08.2024) dhe mbetet në fuqi tridhjetë (30) ditë.
Mbikëqyrja e zbatimit të këtij vendimi bëhet nga Inspektorati Qendror i Tregut në bashkëpunim me Doganën dhe Administratën Tatimore.
Me këtë rast, MINT njofton se Inspektorati Qendror i Mbikqyrjes së Tregut, ditëve në vijim, do të intensifikojë mbikëqyrjen e tregut edhe sa i përket cilësisë dhe sasisë së produkteve të naftës.
