Intervistë me poeten: Florenda Hoti
Intervistoi për Gazetën Frymëzimi: Fatijona Bajraj
Florenda Hoti, e lindur më 01 Korrik 1992 në Gjakovë. Shkollën fillore dhe atë të mesmen e ka përfunduar në Rogovë, ku rezultoi të jetë e suksesshme. Pas kësaj periudhe ka vijuar studimet Bachelor në Fakultetin Ekonomik “UPz Ukshin Hoti” në Prizren.
F.Bajraj: Na folni pak për fillet e karrierës suaj, kur keni filluar të merreni pikërisht me letërsi? Pse bash poezia?
F.Hoti: Me shkrime dhe letërsinë në përgjithësi kam filluar të merrem prej moshës shumë të vogël. Kohët e atëhershme më kanë bërë që shpirtin t’ua jap të bukurës, artit dhe poezisë në veçanti. Me të, pra me poezinë e kam një lidhje shumë të ngushtë shpirtërore. Në vargjet magjike të saj, rigjej veten sa herë që vetja nuk jam.
F.Bajraj: A mendoni që e keni arritur kulmin e karrierës suaj?
F.Hoti: Mendoj që për veten asnjëherë nuk është e mjaftueshme ajo që bën, për pa arritur në cakun apo në synimin kryesor të jetës. Nuk e shoh të arritshme ende pikën kulminante të karrierës sime.
F.Bajraj: A kujtoni ndonjë kohë kur mendoni se keni dështuar në këtë fushë?
F.Hoti: Nuk kisha thënë se kam dështuar, po mendoj se është shumë e rëndësishme që kohës t’i mbijetosh. T’i falesh asaj me shpirt, dështim s’do gjesh kurrë.
F.Bajraj: Sa e keni pas të vështirë dhe sfiduese të jeni këtu ku jeni sot?
F.Hoti: Në çdo etapë të jetës njeriu përballet me sfida të ndryshme. Ajo se çka rrugëtimin tim e ka bë shumë të vështirë është ndjenja e tjetrit kundrejt shkrimit e poezisë sime. Por, që për mua vlente të mos fundosem kurrë në këto ujëra, ato të dorëzimit.
F.Bajraj: Me çka merreni jashtë kësaj, keni ndonjë profesion tjetër?
F.Hoti: Përveçse shkruaj, nuk merrem me tjetër gjë. Ajo se çka krijoj i mjafton vetes sime.. në pamundësi të jem në fokus të tjetër gjëje.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
F.Hoti: Të ardhmen nuk e kemi të premtuar, por i besoj vetes sime dhe patjetër që do më shihni edhe në fusha tjera.
F.Bajraj: Çfarë komenti keni lidhur me gjendjen e letërsisë në përgjithësi në Kosovë?
F.Hoti: Nuk e di sesa saktë mund t’i përgjigjem kësaj pyetje, veçse tek ne, në Kosovë leximin mungesë e kemi. Letërsia denjësisht duhet vlerësuar, ky që prej kohësh s’e kemi bërë siç duhet.
F.Bajraj: Planet e juaja që do t’i realizoni së shpejti?
F.Hoti: Me shpresë që do t’i arrij botimet prozë e poezi, andërr e pandashme e imja.
F.Bajraj: Si e shihni Kosovën pas 10 vitesh në fushën e letërsisë?
F.Hoti: Duke dhënë çdo individ përkushtim të madh nga vetja, uroj që të lartësohet si fushë. Përndryshe edhe para këtyre 10 viteve dëshiroj që kjo veçse të arrihet.
