Intervistë me aktorin e njohur kosovar: Arton Mazreku
Intervistoi për Gazetën Frymëzimi: Fatijona Bajraj
Arton Mazreku u lind me 14.07.1982 në Malishevë. Qysh në moshë të re Artoni kishte filluar të merret me aktrim dhe me artin në përgjithësi. Artoni përveç që është i shumë përfshirë në kinematografinë kosovare ai tashmë e disa vite ka thyer kufijtë dhe ka zënë një rol të veçantë në kinematografinë turke. Disa nga filmat qoftë metrazh i shkurtër apo i gjatë që Artoni ka luajtur janë:
Metrazh i shkurtër: Jetimat e luftës, Plagët e kurbetit, Filmi Amaneti
Seriale: Dashuri me dy teha, Dashuri e helmuar, Belaxhitë
Filma të metrazhit të gjatë: Film Bomba, Dasma e Maleve, Vjeshta e Kuqe, Filmi Era
Monologje: Tahir Sinani, Ilir Lushtakut, Malush Ahmetit (Leutrimit), Hoxhë Hafiz, Liria Ka Emër
Artoni ka qenë pjesë edhe në disa spote të këngëtarëve të ndryshëm.
Përveç në Kosovë ai ka luajtur edhe në Turqi në disa seriale si Beni Affet (më fal) dhe tani është duke u përgatitur për rolin në një serial tjetër që do të luaj.
Artoni gjithashtu tashmë dy vite është pjesëmarrës në festivale ndërkombëtare dhe vlen të ceket pjesëmarrja në festivalin Venice International Film Festival, Cannes Festival.
F.Bajraj: Na folni pak për fillet e karrierës suaj, kur keni filluar të merreni pikërisht me aktrim?
A.Mazreku: Aktrimin e kam filluar nga viti 2018. Fillimisht kam marrë pjesë në videolklipe dhe në monologe të ndryshme. Duke vazhduar më pas me filma të metrazhit të shkurtë dhe të gjatë.
F.Bajraj: A mendoni që e keni arritur kulmin e karrierës suaj?
A.Mazreku: Jo, nuk mendoj pasi që pretendoj që në këtë fushë të jem më i gjithë përfshirë në kinematografi në vende të ndryshme në Ballkan dhe në Evropë. Gjithashtu dua ta sfidoj veten ende më tepër.
F.Bajraj: A kujtoni ndonjë kohë kur mendoni se keni dështuar në këtë fushë?
A.Mazreku: Jo, pavarësisht sfidave nuk kam dështuar dhe kam vazhduar me vetëbesim duke i tejkaluar ato.
F.Bajraj: Sa e keni pas të vështirë dhe sfiduese të jeni këtu ku jeni sot?
A.Mazreku: Mjaft të vështirë pasi që përpos vendit tim fillova të marrë pjesë edhe në vende tjera dhe natyrisht që atje ka qenë më ndryshe, duka filluar nga kultura, gjuha dhe fusha e aktrimit gjithsesi ka qenë më sfiduese.
F.Bajraj: Me çka mirreni jashtë kësaj, keni ndonjë profesion tjetër?
A.Mazreku: Jo, vetëm me aktrim.
F.Bajraj: A do të ju shohim mbase në një të ardhme të afërt në ndonjë fushë krejtësisht tjetër?
A.Mazreku: Nuk mendoj të ndryshoj mendim sepse dua të vazhdoj vetëm me aktrim.
F.Bajraj: Çfarë komenti keni lidhur me gjendjen e aktrimit në përgjithësi në Kosovë?
A.Mazreku: Një gjendje e mirë për të realizuar një film por, shpresoj që të jetë edhe më mirë në vitet në vazhdim.
F.Bajraj: Planet e juaja që do t’i realizoni së shpejti?
A.Mazreku: Filmi i radhës do të shfaqet së shpejti në kinema dhe Cineplex dhe po i njëjti do të konkurroj për çmim Oscar në Londër.
F.Bajraj: Si e shihni Kosovën pas 10 vitesh në fushën e aktrimit?
A.Mazreku: Filmat kosovarë do të jenë të nivelit të konkurrojnë për çmime në festivale ndërkombëtare.
