Ish-ambasadori i OSBE-së, William Walker, është pritur nga kryeministri i Kosovës, Albin Kurti, pas të cilit, tha se me shefin e Qeverisë ka qëndruar për më shumë se një orë, raporton Ekonomia Online.
Pas takimit, Walker tha se Kosova është storie suksesi për arritjet që ka bërë gjatë 25 vjetëve në liri.
“Mirëmëngjesi, sapo pata një takim me kryeministrin Kurti për më shumë se një orë dhe më duhet të them se patëm takim interesant dhe produktiv. Më duhet të them se ky nuk është kodi i veshjes sime në takime me kryeministra, do duhej të kisha veshje zyrtare me kravatë, gjatë dy ditëve të fundit kisha takime të shumta dhe tani e kisha veshjen time të stilit të Kalifornisë. Kosova është sukses i jashtëzakonshëm, për atë se çfarë ka arritur në 25 vjet. Jam këtu si mik i Kosovës, i kryeministrit Kurti”, tha Walker.
Walker shtoi se meritat kryesore për atë që ka arritur Kosova deri tani, janë të vet popullit të saj.
“Duhet të ndjeheni mirë që jeni gazetarë dhe shqiptarë po ashtu, pjesë e këtij kontributi, dhe janë dhënë shume kontribute, kushtuar NATO-s dhe organizatave tjera ndërkombëtare, por mendoj që meritat kryesore i shkojnë kosovarëve për atë që kanë bërë deri me tani, si kryeministrit Kurti dhe kryeministrave tjerë të kaluar, e po ashtu edhe forcave policore. Nuk mendoj se e dini sikurse unë çfarë forcash policore të mira keni, edhe në Amerike kemi policë të mirë, disa po e disa më ndryshe, por ju në Kosovë keni një polici të shkëlqyer”.
