Deputeti i PDK-së, Hajdar Beqa thotë se çështja e dinarit nuk është dashtë të shkojë fare në dialog.
Beqa në një prononcim për GazetaBlic thekson se, kjo çështje do të duhej të zgjidhej përmes BQK-së dhe Republikës së Kosovës.
“Kjo çështje është dashtë të mos shkojë hiç në dialog, por të zgjedhet brenda Bankës Qëndrore dhe Republikës së Kosovës, është kohë e humbur e deligacionit të Kosovës sikur kohën që e ka humbur edhe në shumë raste tjera”, tha Beqa.Sipas Beqës, Kosova do të duhej të fokusohej më shumë në anëtarësimin në KiE dhe në heqjen e sanksionve”, tha ai.
Tutje, ai shton se Qeveria e Albin Kurtit duhet të përfundojë mandatin sa më shpejt.
“Mendoj se energjia e delegacionit të Kosovës është dashtë të fokusohet tek anëtarësimi në KiE, po bëhet një vit që jemi në sanksione dhe nuk ka asnjë kuptim negocimi për dinarin”
“Po shihet që kjo Qeveri nuk ka agjendë dhe nuk ia vlen të shkon më tutje”, tha Beqa për GazetaBlic.
Nënkryetari i LDK-së, Lutfi Haziri thotë se kryeministri i Kosovës, Albin Kurti, bashkë me ekipën e tij janë tërhequr dy hapa mbrapa për çështjen e dinarit.
Haziri në një prononcim për GazetaBlic thekson se, shumë shpejt do të publikohet zgjidhja që e ka propozuar Lajçaku.
“Është një fakt i ri, tash e dy javë që Kurti me ekipën e tij janë tërhequr dy hapa mbrapa në çështjen e dinarit. Është çështje e menaxhimit të kohës dhe besoj që shumë shpejt do të publikohet një zgjidhje që e ka propozuar Lajçaku dhe ekipi i tij”, tha Haziri.Madje, sipas Hazirit, kryeministri i Kosovës do ta pranojë atë propozim të Lajçakut.
“Kurti ka bërë veprime të njëjta edhe në shtatë raste të tjera, ka rezistu, por në fund e ka pranu propozimin e ndërmjetësit ndërkombëtar”, tha Haziri për GazetaBlic.
Deputetja e AAK-së, Time Kadrijaj thotë se veprimet e pa koordinuara me aletatët tanë, nuk i bëjnë mirë Kosovës.
Kadrijaj në një prononcim për GazetaBlic thekson se, edhe me çështjen e dinarit, Kurti ka bërë veprime populiste, pasi sipas saj, po mundohet që ta mbajë elektoratin e vetë.
“Me eksperimentet e Qeverisë tashmë jemi mësuar, fillimisht e ka nisur me implementimin e marrëveshjes për targa, që më pas pati pasoja veç Kosova. Këto veprime të pa koordinuar me aleatët tanë nuk i bëjnë mirë dhe nderë Kosovës dhe ne ende po ballafaqohemi me pasojat e atij veprimi të pamatur”, tha Kadrijaj.
“Duke qenë se Kurti ka pranuar të gjitha kushtet, ka pranuar marrëveshjen në Bruksel, ‘Zajednicën’ e tyre, tash po mundohet me veprime populiste të mbajë elektoratin e vetë dhe t’iu thotë votuesëve të vet, kinse po bën diçka, në pjesën e veriore”, shton ai.
Të zvarritur, deputetja e AAK-së e sheh edhe procesin e dialogut.
“Normal që veprimi i BQK-së është i drejtë, e përkrahi, por veprimet e pa koordinuara nuk i sjellin dobi Kosovës. Ne po e shohim që po zvarritet gjithçka, përfshirë këtu edhe procesin e dialogut”, tha Kadrijaj.
“Meqenëse jemi në vitin e fundit të kësaj Qeverie, kjo është Qeveria më jotransparente dhe Qeveria që i ka sjell dëm Kosovës”, shton ajo për GazetaBlic.
Kujtojmë se, më 15 maj (e mërkurë), për herë të gjashtë me radhë, në Bruksel do të takohen kyenegociatorët e Kosovës dhe Serbisë, në lidhje me Rregulloren e BQK-së ku ndalohet përdorimi i dinarit në Kosovë.
Pas përfundimit të fazës së tranzicionit të Bankës Qendrore, në partinë në pushtet theksojnë se s’ka asnjë alternativë që e parandalon apo shtyn vendimin për dinarin.
