Kryeministri i Kosovës, Albin Kurti ka zhvilluar sot një takim pune me nënkryetaret e tri komunave në veri të vendit.
Në një postim në Facebook, ka shkruar se pas takimeve në Berlin e ka parë të arsyeshme që të diskutoj me përfaqësuesit serb të komunave veriore.
“Takim pune me nënkryetaren e Komunës së Mitrovicës së Veriut, Katarina Adançiq, nënkryetaren e Komunës së Zveçanit, Natasha Tomaniq dhe nënkryetaren e Komunës së Leposaviqit, Marina Bogojeviq.
Kësaj radhe bashkë me ministrat Nenad Rashiq dhe Elbert Krasniqi. Pas takimeve në Berlin, konsiderova që një hap i duhur është të diskutoj me përfaqësues serb të komunave veriore. I konsultova mbi nevojat për shërbimet komunale që mund të ushtrohen të bashkërenduara në kuptim të lirisë së asocimit të komunave”, ka shkruar Kurti.
Kryeministri ka theksuar se të tria nënkryetaret i kanë thënë që e shohin anëtarësimin e Kosovës në Këshill të Evropës si një hap të rëndësishëm për fuqizimin e komunave të tyre.
“Dhe, më premtuan që kur do të takojnë përfaqësuesit diplomatikë të QUINT-in do t’ua shprehin këto kërkesa gjithashtu. Ky ishte bashkëbisedimi ynë i dytë në pak se dy javë. Komunikimi i shpeshtë dhe i rregullt është interesim, kujdes dhe vullnet i dyanshëm për të diskutuar e planifikuar projekte, dhe për adresuar sfida e vështirësi”, ka shkruar Kurti.
Kurti ka shprehur mirënjohje për të tria nënkryetaret për punë e tyre të përditshme dhe kurajën për t’i shërbyer publikes dhe qytetarëve.
