Federata e Xhudos e Kosovës ka thënë se xhudisti Akil Gjakova momentalisht ndodhet jashtë territorit të Kosovës, dhe do të dorëzohet menjëherë tek organet e rendit dhe të drejtësisë në momentin që do të arrijë në Kosovë
Njëkohësisht kjo federatë ka shpreshur besim në pafajësinë e Gjakovës.
“Federata e Xhudos e Kosovës dënon fuqishëm çdo formë dhune dhe jemi thellësisht të shqetësuar për ngjarjet e fundit në vendin tonë.
Ne e kemi për prioritet të mbrojmë dhe të promovojmë barazinë gjinore, e cila është e vërtetuar me arritjet kulminante dhe përkrahjen e shkëlqyeshme të sportisteve tona.
Ne besojmë në pafajësinë e Akilit dhe urojmë që organet e rendit të drejtësisë sa më parë të zbardhin rastin. Andaj ftojmë mediat të tregojnë maturi në trajtimin e këtij rasti dhe të ndalojnë njollosjen dhe gjykimin publik të një nga figurave që vazhdon të promovoj imazhin pozitiv të vendit tonë”, ka theksuar federata. “Akili momentalisht ndodhet jashtë territorit të Kosovës, dhe do të dorëzohet menjëherë tek organet e rendit dhe të drejtësisë në momentin që do të arrijë në Kosovë”.
Ndryshe, xhudisti Akil Gjakova është shpallur në kërkim nga Policia e Kosovës lidhur me dhunën në familje. Në fundjavë Prokuroria e Shetit kishte autorizuar Policinë e Kosovës që ta arrestonte Gjakovën, pasi bashkëshortja e tij e kishte denoncuar atë në Polici.
