Ish-sportistja e njohur dhe anëtare e Bordit Ekzekutiv të Komitetit Olimpik të Kosovës, Shqipe Bajçinca-Brestovci është ndarë nga jeta, pas një sëmundjeje të rëndë
Lajmin e ka bërë të ditur Komiteti Olimpik i Kosovës (KOK), i cili ka dërguar një telegram ngushëllimi familjeve Bajçinca dhe Brestovci.
Letra e plotë:
E nderuara familja Bajçinca-Brestovci,
Me pikëllim të thellë morëm lajmin për ndarjen nga jeta të kontribueses së madhe të sportit, Shqipe Bajçinca-Brestovci.
Shqipja ishte anëtare e Bordit Ekzekutiv të KOK-ut në dy mandatet e fundit, duke dhënë kontribut të çmuar për gjithë lëvizjen Olimpike, promovimin e vlerave olimpike dhe avancimin e sportit.
Ajo ishte kryetare komisionit “Femra dhe Sporti”, ku ishte zë I femrave, të cilat i shtynte për të drejtat e tyre në sport, anëtare e Komisionit për kategorizimin e sporteve, sportistëve dhe trajnerëve etj.
Bajçinca-Brestovci ishte edhe pedagoge në Fakultetin e Edikimit Fizik dhe Sportit, ndërsa gjatë karrierës 24 vjeçare si si sportiste ishte marrë edhe me karate, atletikë dhe hendboll.
Shqipja, e cila dallohej për tejkalim të sfidave, këtë herë nuk mundi të kalojë sëmundjen e rëndë, nga e cila po vuante prej disa vitesh.
Ndarja e saj nga jeta do të lë boshllëm të madh tek brezat e rinj, e sidomos vajzat për të cilat ishte frymëzim, se si me punë, përkushtim dhe profesionalizëm mund të arrihen sukseset.
Në emër të Bordit Ekzekutiv të Komitetit Olimpik të Kosovës dhe gjithë lëvizjes olimpike në Kosovë, i shpreh ngushëllimet më të thella, familjes së saj, sportdashësve dhe miqëve të shumtë.
Ismet Krasniqi
President i Komitetit Olimpik i Kosovës
