Kryeministri i Kosovës, Albin Kurti, ka shprehur gatishmërinë për të shkuar në zgjedhje.
Ai në një intervistë për Radio Evropa e Lirë, tha se nëse opozita dëshiron zgjedhje, Kuvendi duhet të shpërbëhet dhe vendi duhet të shkojë në zgjedhje.
E, deputeti i AAK-së, Pal Lekaj, në një prononcim për Gazeta Blic, po e vlerëson këtë deklaratë të Kurtit si më të mençurën.
Ai thotë se Kurti e ka ngritur flamurin e bardhë dhe nuk i ka mbetur rrugë tjetër pos zgjedhjeve, për shkak të tri gabimeve që i ka bërë.
“Sa i përket deklarimit të kryeministrit Kurti për shkuarjen në zgjedhje, mendoj që ai nëse ndonjëherë ka dhënë një deklaratë të mençur është kjo, sepse ka dështuar në çdo segment dhe mund të them që e ka ngritur flamurin e bardhë, është dorëzuar dhe mendoj që tani nuk i ka mbetur tjetër, pos që vendi të shkojë në zgjedhje. 1.presioni ndërkombëtar për gabimet që i ka bërë në dialog, për vendimet që i ka marrë pa konsulta me ta që kanë shkuar në disfavor të Kosovës dhe e treta është që ka ngecur edhe në zhvillim ekonomik, edhe në investime kapitale, edhe në të gjitha fushat, arsim, shëndetësi, kështu që ai me të drejtë e thotë që po shkojmë në zgjedhje”, vlerëson deputeti për Gazeta Blic.
Lekaj thekson se AAK është e gatshme për zgjedhje qysh sot, nëse Kurti i mbledh nënshkrimet për shpërbërje të Kuvendit.
“AAK ka dorëzuar mocion për rrëzim të Qeverisë, e dini, ne jemi të gatshëm që sot nëse z.Kurti i vë nënshkrimet për shpërbërje të Parlamentit, Aleanca është e gatshme që të shkojmë në zgjedhje për 45 ditë dhe është e shëndetshme për Kosovën duke i parë veprimet dhe mos punën e kësaj qeverie”, deklaron deputeti i AAK-së, Pal Lekaj./Gazeta Blic/
