Literaturës dhe burimeve në gjuhën shqipe për një temë që është në vëmendjen globale, Ukrainën dhe konfliktin me Rusinë, i janë shtuar edhe 3 botime të veçanta të autorit Lutfi Bilalli.
Përmes një aktiviteti promovues, për publikun u bënë të njohura 3 botimet:
- Historia e Ukrainës dhe e Krimesë (Luftërat dhe aleanca ‘Vëllazëria sllave’ mes ukrainasve), në të cilin në hollësi paraqitet rrugëtimi historik, përpjekjet dhe vuajtjet e popullit ukrainas.
- Ukraina – Përplasja Perëndim-Rusi (Potencianli bërthamor dhe rikthimi i Luftës së Ftohtë), ku ofrohen të dhëna dhe detaje mbi historinë, gjeografinë dhe mbi potencialin ushtarak që kanë palët në konflikt.
- Roli i diplomacisë botërore në konfliktin Rusi-Ukrainë (Kronologjia e luftës shkurt 2022 – dhjetor 2023), ku janë përmbledhur dhe analizuar angazhimet e diplomacisë në parandalimin e konfliktit dhe është prezantuar në mënyrë kronologjike situata dhe pushtimi rus në Ukrainë.
Në promovim, nën moderimin e Mentor Mripës, për librin kanë folur prof. dr. Nexhmedin Spahiu, që njëherësh ka qenë edhe recensentë i librave, dhe prof. dr. Gëzim Qerimi, të cilët kanë vlerësuar veprat e Bilallit si material të rëndësishëm për lexuesin shqiptar, dhe për studiuesit dhe ekspertët e fushës në veçanti.
Një veçanti dhe surprizë, në këtë aktivitet promovues, ishte prania e gazetarëve ukrainas të cilët janë zhvendosur dhe që jetojnë e veprojnë në Kosovë, dhe e mirëpritën botimin dhe promovimin e librave për shtetin e tyre.
Trilogjinë e Bilallit e ka botuar shtëpia botuese “3SD” me seli në Prishtinë.
