Gjashtë oferta janë dorëzuar në Ankandin e Parë Solar Foltovoltaik prej 100 MW, me ç’rast të shtunën u bën publike edhe emrat e kompanive ofertuese. Dy konsorciume ishin nga Turqia, dy nga Kosova, ndërsa një nga Franca dhe një tjetër nga Egjipti, raporton Ekonomia Online.
Në ceremoninë e rastit, u tha se procesi i ankandit ka qenë i hapur dhe transparent, duke siguruar kushte të barabarta për të gjithë pjesëmarrësit.
Ministrja e Ekonomisë, Artane Rizvanolli, tha se investitorët e interesuar kanë dorëzuar ofertat e tyre, të cilat Ministria e Ekonomisë i ka vlerësuar në mënyrë të drejtë dhe profesionale.
“Sot shpalosëm gjashtë kompani ose konsorciume që kanë dorëzuar ofertat e tyre për ndërtimin e impiantit solar në Kosovë prej 100 megavatesh. Gjatë procesit përmes përgjigjeve në më shumë se dhjetë raundeve të sqarimeve jemi siguruar që të udhëheqim një proces të drejtë dhe të hapur, ku të gjitha palët janë të mirinformuara. Deri tani me përkrahjen e USAID-it, kemi zhvilluar një proces të drejtë konkurrues me transparencë të plotë dhe mund të themi lirisht se kemi bërë një proces shembull për rajonin”, u shpreh Rizvanolli.
E pas fazës së parë, Rizvanolli tha se do të ketë edhe fazë të dytë por në mënyrë elektronike, ku ofertuesi me çmim më të ulët do të shpallet fituese.
“Në fazën e dytë do të organizohet një ankand elektronik, ku kompanitë ose konsorciumet e kualifikuara do të kenë mundësinë që të ulin çmimin e tyre fillestar, duke garuar me njëra-tjetrën dhe në fund ofertuesi që ka dorëzuar çmimin më të ulët në përmbyllje të ankandit të fazës së dytë, do të shpallet fituese. Pranimi i këtyre ofertave sot, nga investitorë seriozë dhe me eksperiencë në fushën e energjisë së ripërtrishme, duke përfshirë këtu edhe kompanitë serioze nga vendi e diaspora, na bën tejet të lumtur dhe e shohim si një rezultat i një pune të palodhshme të Ministrisë së Ekonomisë por jo vetëm”, u shpreh ajo.
Rizvanolli e ka pranuar se sulmi i 24 shtatorit në Banjskë nga grupet paraushtarake të mbështetura nga Serbia kishin ngjallur pasiguri të disa kompani të huaja për të investuar në Kosovë.
Disa nga to që kanë qenë të interesuara për të investuar në ndërtimin e parkut me energji solare dhe kishin dashur të tërhiqeshin pas tensioneve në veri të Kosovësn.
Ministrja e Ekonomisë, Artane Rizvanolli, tha se kjo ka qenë arsyeja pse afati është shtyrë për herën e tretë.
“Herën e tretë ka qenë veçanërisht sulmi në Banjskë që ka qenë 10 ditë para përmbylljes së afatit të ofertave. Kemi pasur informatat se disa kompani që kanë dashur të investojnë po planifikojnë të tërhiqen për shkak se ka krijuar një pasiguri dhe për të mos rrezikuar që kompanitë që dështojnë të investojnë, mos të tërhiqen, kemi dhënë një mundësi shtesë për të treguar sigurinë që ofron Kosova për investime”, ka thënë Rizvanolli.
Derisa ka dhënë një shpjegim edhe për dy shtyrjet e mëhershme. “Herën e parë ka qenë mesi i verës, andaj ka qenë e natyrshme që shumë kompani e kanë pasur të pamundur të aplikojnë; herën e dytë gjithashtu e kemi parë që ka kompani të cilat janë formuar më vonë dhe kanë pasur interesim të aplikojnë”, tha ajo.
Kompanitë dhe konzorciumet që kanë ofertuar janë:
Konzorciumi “Çalik-Limak” nga Turqia,
Kompania “Notus Energy Kosovo” nga Gjermania, përfaqësia në Kosovë,
Kompania “Akuo Energy SAS” nga Franca,
Kompania “Elswedy Electric” nga Egjipti,
Konzorciumi “Guris Insaat Muhendishik” nga Turqia, si dhe
Konzorciumi “Orllati” nga Zvicra, përfaqësia në Kosovë.
Ankandi është mbyllur më 31 janar 2024 në ora 14:00, ku janë pranuar 6 oferta, ndërsa për tri ditë, deri sot në ora 14:00, ishte afati për pranimin e ofertave të mundshme përmes postës.
Gjatë javëve në vijim, komisioni vlerësues, i përbërë nga anëtarë të Ministrisë së Ekonomisë, Ministrisë së Mjedisit, Planifikimit Hapësinor dhe Infrastrukturës, Zyrës e Rregullatorit për Energji, si dhe Operatorit të Transimionit – KOSTT, do të vlerësojë ofertat kundrejt kërkesave minimale financiare, profesionale dhe teknike, siç janë përcaktuar në dosjen e ankandit.
Si fazë e dytë, do të organizohet një ankand elektronik ose “e-ankandi”, ku kompanitë e kualifikuara do të kenë mundësinë të ulin çmimin e tyre fillestar duke garuar me njëra-tjetrën. Ofertuesi që ka dorëzuar ofertën me çmimin më të ulët në përmbyllje të “e-ankandit” do të shpallet fitues.
