Sot, në ambientet e Institutit Albanologjik të Prishtinës u mbajt “Ora përkujtimore” në nderim të poetit të majave poetike, Adem Gashi, i cili ndërroi jetë ditë më parë në moshën shtatëdhjetëvjeçare. Kjo orë përkujtimore u organizua nga Art Club “Rifat Kukaj” dhe shtëpia botuese “Armagedoni”. Salla e Institutit Albanologjik të Prishtinës ishte e vogël për t’i zënë gjithë miqtë e poetit. Para të pranishmëve morën fjalën miq dhe bashkëpunëtor të poetit.
Izet Abdyli, udhëheqës i Art Club “Rifat Kukaj” falënderoi të pranishmit dhe shpalosi detaje nga jeta dhe vepra e autorit, para, gjatë dhe pas luftës. Abdyli e çmoi lart edhe pjesën njerëzore të poetit, duke e quajtur njeri human, i dashur dhe i respektuar nga të gjithë.
Berat Dakaj, kryeredaktor i shtëpisë botuese “Armagedoni” dhe njëkohësisht edhe botues i veprave të fundit të Adem Gashit shpalosi copëza të kujtimeve të autorit, si dhe bëri një rikujtim të veprës së autorit të madh. Gjatë fjalimit, Berat Dakaj e quajti Adem Gashi me epitetin “Adem kreshniku” për shkak të veprave madhore të autorit.
Emin Emini, profesori universitar, e shpalosi profilin krijues të Adem Gashit. Ai e çmoi lart lëvrimin e gjinive dhe të zhanreve nga Adem Gashi. Sipas Emin Eminit, Adem Gashi ishte i fuqishëm, si në poezi, ashtu edhe në prozë dhe eseistikë.
Afrim Hysenaj, mik i poetit dhe bashkëpunëtor i shtëpisë botuese “Armagedoni” e quajti poetit Adem Gashi mjeshtër të vargut dhe poetit që shkroi tekstet më të fuqishëm për dëshmorët e luftës së shenjtë të Ushtrisë Çlirimtare të Kosovës. Ai kujtoi bashkëpunimin që kishte me Adem Gashit, për dy librat e tij dhe ndihmën e madhe që ia dha në redaktimin e librave.
“Ora përkujtimore” përfundoi me fjalimit e Dardanit, të birit të Adem Gashit, i cili falënderoi të pranishmit, gjithë miqtë dhe shokët e poetit, ku tha se sot në sytë e gjithë të pranishmëve po e sheh babanë e tij.
