Gjykata Themelore në Prishtinë ka aprovuar marrëveshjen për pranimin e fajësisë e lidhur në mes Prokurorisë Speciale të Republikës së Kosovës (PSRK) dhe të akuzuarit për ushtrim ndikimi, Shukri Xhaferi.
Xhaferi akuzohet se kishte pranuar shumën prej 12 mijë euro me premtimin se do të ndikoj tek zyrtarët e Agjencisë për Zhvillimin e Bujqësisë për të futur dy aplikues në listën e përfitimit të granteve, e që pas pranimit të parave ishte arrestuar në flagrancë.
Këtë marrëveshje, e ka aprovuar në seancën e së mërkurës gjykatësi Lutfi Shala, raporton “Betimi për Drejtësi”.
Paraprakisht, prokurori special Dren Paca deklaroi se së bashku me parashtrimin e aktakuzës ndaj Xhaferit në të njëjtën datë, të njëjtës i është bashkangjitur edhe marrëveshja për pranimin e fajësisë që është arritur ndërmjet palëve në këtë rast.
Me anë të kësaj marrëveshje prokurori Paca tha se është rekomanduar edhe dënimi i cili duhet të shqiptohet ndaj të akuzuarit e që sipas tij është dënimi me gjobë në shumë prej 5 mijë eurove dhe dënimi me burgim në kohëzgjatje prej 8 muajve.
I njëjti i ka propozuar gjykatës që marrëveshjen e tillë ta aprovoj dhe dënimi i rekomanduar t’i shqiptohet të akuzuarit Xhaferi.
Edhe mbrojtësi i të akuzuarit Xhaferi, avokati Abit Asllani deklaroi se janë plotësisht dakord me këtë marrëveshje, përveç që sipas tij, ndoshta është harruar që aty të ceket minimumi dhe maksimumi i dënimit.
“Ndoshta kemi harru pa dashje me cek minimumin dhe maksimumin i cili për neve ka qenë shumë ma i përshtatshëm ose edhe për gjykatën, një mundësi që ta shpreh autonominë e vet në mënyrën më të mirë sepse gjykata e ka të drejtën që edhe ta pranoj edhe mos ta pranoj marrëveshjen e fundit është, ajo që e thotë fjalën”, tha avokati Asllani.
Sipas tij, do të ishte e preferueshme që gjykata në vendimmarrje të përcaktoj edhe minimumin e pranueshëm ligjërisht, pra 5 ose 6 muaj deri në 8 muaj burgim dhe dënimi me gjobë prej 1 mijë deri në 5 mijë euro.
I akuzuari Xhaferi ka mbështetur në tërësi fjalët e avokatit Asllani.
Ndryshe, Prokuroria Speciale e Republikës së Kosovës (PSRK), më 29 dhjetor 2023, ka ngritur aktakuzë kundër Shukri Xhaferit i cili ngarkohet se nga data 28 dhjetor 2022 deri më 16 janar 2023 në Vushtrri dhe në Prishtinë, i njëjti me dashje dhe në mënyrë të drejtpërdrejt kërkon dhe pranon përfitim pasuror për vete me premtimin se do të ushtroj ndikim të padrejtë mbi vendimmarrjen e personave zyrtar në Agjencinë për Zhvillimin e Bujqësisë.
Aktakuza thotë se Xhaferi fillimisht duke pasur dijeni se aplikuesi Betim Grabanica kishte aplikuar në emër të familjares Marigonë Grabanica për vitin 2022 për përfitimin e granatit në projektet investuese në asete fizike të ekonomikeve bujqësore dhe kishte dijeni se Shemsi Xhaferi kishte aplikuar për grant dhe ishin në pritje të rezultatit, takohet disa herë me Betim Grabanicën dhe kërkon para në mënyrë të drejtpërdrejtë dhe përmes tij në mënyrë të tërthortë kërkon para nga Shkelzen Xhaferi me premtimin se do të ndikoj tek zyrtarët në Agjencinë për Zhvillimin e Bujqësisë për të përfituar grantet.
Mirëpo, gjatë aplikimit të masave të veçanta të simulimit të veprës së korrupsioni më 16 janar 2023, në restorantin HIB Petrol në Shkabaj, i akuzuari Xhaferi takohet me Betim Grabanicën dhe hetuesin dhe sipas marrëveshjes paraprake pranon shumën prej 12 mijë euro dhe menjëherë pasi del nga vetura i njëjti arrestohet dhe parat e përdoruara në simulim gjenden në posedim tek ai.
Me këto veprime, Xhaferi akuzohet se ka kryer veprën penale “Ushtrim i ndikimit”, nga neni 424 paragrafi 1 të Kodit Penal të Republikës së Kosovës (KPRK), vepër kjo e dënueshme me gjobë dhe me burgim prej një deri në tetë vjet.
