Në ambientet e Kuvendit Komunal të Skenderajt, përgjatë dy ditëve u mbajt trajnimi “Menaxhimi i mediave sociale” organizuar nga Shoqata e Personave me Aftësi të Kufizuara, Handikos-Skenderaj. Ky trajnim u mbajt në kuadër të projektit “Së bashku mund ta bëjmë ndryshimin”, mbështetur nga UNDP, me fond të Bashkimit Evropian dhe Komuna e Skenderajt.
Në hapjen e këtij trajnimi ishte prezent edhe drejtoresha e Drejtorisë për Zhvillim Ekonomik, Ndërmarrësi, Inovacion dhe Turizëm, znj. Besarta Meha Ademi, e cila falënderoi Handikos-Skenderaj për organizimin, si dhe inkurajoi personat me aftësi të kufizuara dhe të rinjtë që të marrin pjesë sa më shumë në trajnime, të cilat ia zhvillojnë kapacitetet e tyre në sfera të ndryshme të jetës.
Gjatë dy ditëve të trajnimit, tridhjetë e tre persona me aftësi të kufizuara dhe të rinj morën njohuri themelore, në lidhje me menaxhimin e rrjeteve sociale dhe si t’i përdorin ato, që në të ardhmen të përfitojnë edhe materialisht nga menaxhimi i saktë i tyre.
