Edhe Skenderaj, njëlloj si në qytetet e tjera kosovare u përkujtua 15 Janari, Dita e Përkujtimit të Viktimave të Gjenocidit në Kosovë. Nismën e ndërmarrë nga Qendra “Gjenocidi në Kosovë- Plagë e hapur” për ndezjen e qirinjve e vazhduan edhe të rinjtë nga Rinia Demokratike e Skenderajt. Në këtë aktivitet, të rinjtë ndezën qirinj, ku formuan numrin dyzet e pesë, në përkujtim të viktimave të Masakrës së Reçakut.
Antigona Maliqi nga Rinia Demokratike e Skenderajt, në rrjetin social facebook, ndër të tjerat tha: “Në çerekshekullin e Masakrës së Reçakut nderuam ata që u bënë pikë kthese për lirinë e Kosovës së shenjtë, ku së bashku me të rinjtë tanë me qirinjtë e ndezur formuam numrin 45 si simbolikë e 45 viktimave të kësaj masakre.”
Në këtë aktivitet morën pjesë stafi i Organizatës për Kulturë dhe Edukim “Frymëzimi”, të cilët edhe ditë më parë morën pjesë në aktivitete të tjera për shënimin e Masakrës së Reçakut dhe 15 Janarit, si ditë të përkujtimit të viktimave të gjenocidit në Kosovë.
