Kryetari i Partisë Demokratike të Kosovës (PDK), Memli Krasniqi, është i bindur se viti 2024 do të jetë vit zgjedhor në Kosovë.
Në një intervistë për fundvit me Ekonomia Online, kreu i PDK-së ka thënë se fatkeqësisht 2023-ta është edhe një vit tjetër i humbur për Kosovën, pasi nuk ka përparim në asnjë nga sektorët, për shkak të gabimeve edhe paaftësisë së Qeverisë Kurti.
Sipas tij, Kosova ka një politikë të jashtme në “vdekje klinike”, ka stagnim në ekonomi, shëndetësia është në kolaps, sikurse ka degradim edhe në arsim e fusha të tjera. Krasniqi theksoi se rritja ekonomike që parashihet të jetë rreth 3.5 për qind për vitin 2023, është jashtëzakonisht e vogël për një vend si Kosova me kaq shumë sfida, sidomos post-pandemike.
“Është me e vogël sesa rritja mesatare ekonomike në kohën e viteve të para të pasluftës, kur ka qenë rreth 5 për qind, e ka qenë edhe në kohën e krizës më të madhe globale financiare (2008)”, deklaron lideri opozitar.
“Mbi të gjitha nën Qeverinë Kurti, për herë të parë ka ndodhur diçka që ka qenë e paparamendueshme: Kosova ka marrë sanksione nga Bashkimi Evropian, masa ndëshkuese konkrete, pezullim të rreth 300 milionë eurove të dedikuar për Kosovën dhe qytetarët e saj, pikërisht për shkak të qeverisë dhe për shkak të kryeneçësisë, gabimeve edhe mashtrimeve të kryeministrit”, thekson Krasniqi.
Nga ana tjetër, ai shton, se propaganda qeveritare vazhdon që të jetë shumë aktive. “Absurditetet e tij (Kurtit) janë të jashtëzakonshme. Para disa ditësh në dhjetor dolën dhe thanë që ekonomia e Kosovës është e treta në Evropë. As fëmijët nuk mund ta besojnë një gjë të tillë”.
Një ndër arsyet kryesore të vendosje së sanksioneve, sipas Krasniqit, ka qenë “pabesia” e kryeministrit. “Janë marrë vesh për diçka e ai nuk e ka mbajtur fjalën”.
Kryetari i PDK-së thotë se qytetarët e Kosovës, por as partnerët ndërkombëtarë, nuk e kanë të qartë a e ka pranuar Albin Kurti Draftin e Statusit të Asociacionit, a do ta aprovojë në Qeveri dhe a do të dërgojë për opinion në Gjykatën Kushtetuese.
“Ne e kemi humbur respektin e partnerëve të rëndësishëm të Kosovës, pikërisht për shkak të këtyre arsyeve. Sepse njerëzit dëshirojnë që të kenë një parashikueshmëri në raporte, dhe me Kurtin nuk e kanë një gjë të tillë”.
Por, Krasniqi mendon se më nuk ka hapësirë për taktizime. “Nuk do të ketë rrugëdalje, përveç të marrë veprime dhe vendime, në javët e ardhshme. Nuk e pret bota Albin Kurtin me bë hajgare me ta, siç ka bërë deri tash”.
“Unë besoj që kjo do të ketë ndikim edhe tek veprimet që ndërlidhen me zgjedhjet e parakohshme për të cilat unë jam i bindur që ne do t’i mbajmë në vitin 2024”, ka deklaruar Krasniqi, në këtë intervistë.
Kryetari i Partisë Demokratike ka komentuar dhe sondazhin e publikuar gjatë muajit dhjetor, ku partia në pushtet del se ka ende përkrahje të madhe. Ai e ka quajtur të papranueshme përfshirjen e ish-presidentit Thaçi e ish-kryeparlamentarit Veseli, në këtë sondazh dhe në diskutimet ditore politike.
“Sondazhi i vetëm që vlen është sondazhi i kutisë së votimit dhe dita e zgjedhjeve… Nëse kryeministri vërtet beson në sondazhe të tilla, nëse ai përnjëmend mendon se populli ende vazhdon që të mbështesë, unë e ftoj që t’i shpallim zgjedhjet qysh sot”, thotë Krasniqi, i cili shton se “për t’ia ruajtur egon” Kurtit, mund të shpërndahet Kuvendi dhe jo ai të japë dorëheqje.
INTERVISTA E PLOTË ME KRYETARIN E PDK-SË, MEMLI KRASNIQI:
EO: Rëndom në fund të vitit, bëhen disa bilance në ekonomi, politikë e fusha të tjera të rëndësishme. Si e vlerësoni ju vitin 2023 për Kosovën? E pashmangshme është dhe pyetja si e vlerësoni qeverisjen në vitin 2023?
Krasniqi: Fatkeqësisht këto janë të pandara njëra prej tjetrës, sepse qeverisja e ndikon edhe bilancin e vendit tonë edhe të qytetarëve dhe fatkeqësisht viti 2023 është pothuajse edhe një vit tjetër i humbur për Kosovën. I humbur sepse le që nuk kemi lëvizur përpara në pothuajse në asnjë nga sektorët, por në disa raste kemi bërë edhe hapa mbrapa, për shkak të gabimeve edhe paaftësisë së qeverisë. Dikush mund të thotë se kjo është e kuptueshme si deklaratë prej një lideri të opozitës, por kemi nevojë të bëjmë diskutimin shumë konkret dhe t’i shohim fushat një nga një. Ne kemi një politikë të jashtme me vdekje klinike që nga dita e parë e kësaj qeverie. Kjo politikë e jashtme le që nuk ka arritur ta sjellë asnjë njohje, asnjë anëtarësim në organizata ndërkombëtare, por realisht i ka humbur edhe respektin të cilin e ka pasur Kosova me shumë prej partnerëve e miqve ndërkombëtarë. Mbi të gjitha nën Qeverinë Kurti, për herë të parë ka ndodhur diçka që ka qenë e paparamendueshme: Kosova ka marrë sanksione nga Bashkimi Evropian, masa ndëshkuese konkrete, pezullim të rreth 300 milionë eurove të dedikuar për Kosovën dhe qytetarët e saj, pikërisht për shkak të qeverisë dhe për shkak të kryeneçësisë, gabimeve edhe mashtrimeve të kryeministrit.
Nga anën tjetër, ne si popull e si komb, edhe si shtet, kemi një konsensus do të thotë që duhet që të jemi anëtar të kësaj familjeje politike. Dhe çka ndodh në vitin 2023? Neve kjo familje politike na sanksionon dhe na penalizon, për shkak të kryeministrit dhe të qeverisë. Pra këta janë hapa prapa, nuk është as mirëmbajtje e një situate që edhe ashtu ka pasur më te vërtet hapësirë për të kërkuar më shumë. Për shembull tek procesi integrues në kohën kur për herë të parë pas shumë vitesh, Bashkimi Evropian ka një impetus të ri dhe një gatishmëri për të zgjeruar BE-në, aq sa iu ka dhënë status të kandidatit, e në disa raste edhe fillim të negociatave, shteteve si Gjeorgjia, Moldavia e Ukraina, por edhe Bosnja, me gjithë problemet. Për Kosovën nuk ka një lëvizje as milimetrike përpara.
EO: Çka do të duhej të bënte Kosova, sipas jush, për t’u hequr sanksionet?
Krasniqi: E para e punës duhet që të ketë një qeveri të përgjegjshme, duhet të ketë një kryeministër të besueshëm, duhet të ketë një qasje e cila e ruan partneritetin me miqtë me të rëndësishëm dhe mbështetësit më të mëdhenj të Kosovës, në radhë të parë me ShBA-në dhe me BE-në. Sepse siç është bërë tashmë publike dhe e ditur, një ndër arsyet kryesore të vendosje së sanksioneve ka qenë pabesia e kryeministrit, fakti që janë marrë vesh për diçka e ai nuk e ka mbajtur fjalën, fakti që ka pasur një kërkesë për diçka edhe ai ka vepruar ndryshe. Kjo ka pasur dëme reale për ekonominë e vendit tonë, por përtej politikës së jashtme unë fillova, po mundohem telegrafikisht t’i numëroj disa prej fushave të tjera. Ne kemi stagnim në ekonomi; rritja ekonomike që mund të jetë rreth 3.5 për qind këtë vit, është jashtëzakonisht e vogël për një vend i cili ka kaq shumë sfida, sidomos post-pandemike. Është me e vogël sesa rritja mesatare ekonomike në kohën e viteve të para të pasluftës, kur ka qenë rreth 5 për qind, e ka qenë edhe në kohën e krizës më të madhe globale financiare. Ka pasur një dështim total tek investimet publike; investimet kapitale kurrë nuk kanë qenë ne nivelin e përqindjes më të vogla sesa tash. Realizimi i buxhetit është një dështim për të cilin nuk do të duhej të vazhdonte askush, prej ministrit të Financave e tutje, që ka pasur përgjegjësi këtu. Në arsim kemi degradim të skajshëm, rezultatet e PISA-s janë dëshmia për rënien e cilësisë edhe në mësimdhënie, edhe në mësim-nxënie mbi të gjitha. Sepse ky kryeministër, dhe kjo qeveri, para se gjithash që nga viti i kaluar i kanë armiqësuar edhe mësimdhënësit e Kosovës duke tentuar që t’i shkelë edhe në dinjitetin e tyre, duke i mbajtur në grevë për katër-pesë javë.
Në anën tjetër, shëndetësia është në kolaps pothuajse total. Edhe në fusha ku ka pasur një anulim të listave të pritjes, ku ka pasur edhe furnizim të barnave edhe të pajisjeve esenciale, sot nuk e kemi një gjë të tillë. E njëjta gjë është pothuajse në secilën fushë. Kjo është arsyeja për çka e thashë që është një vit i humbur, sepse vite të humbura janë ato ku nuk ka progres, sepse kemi pasur kryesisht vetëm regres. I vetmi progres është shënuar në rritjen e arrogancës së kësaj qeverie, dhe në keqmenaxhim në këtë qeverisjen e tyre. Fakti që edhe me buxhetin e viti 2024, kjo qeveri i ka ndëshkuar qytetarë e komunave ku nuk i ka fituar zgjedhjet lokale, tregon për mendësinë e kësaj qeverie.
EO: Pse nuk po arrin opozita edhe pas tri vjetësh qeverisjeje, me rezultate pothuajse të padukshme nga Qeveria, të mos bindë qytetarin për një alternativë tjetër? Sondazhet e fundit, nëse iu besohet, e nxjerrin Kurtin me rreth 48 për qind përkrahje?
Krasniqi: Sondazhi i vetëm që vlen është sondazhi i kutisë së votimit dhe dita e zgjedhjeve. Së paku nga korriku, edhe zyrtarisht si PDK, me qëndrim edhe të Këshillit tonë drejtues ne kemi kërkuar që të shpërndajmë Kuvendin edhe të shkojmë në zgjedhje. Nëse kryeministri vërtet beson në sondazhe të tilla, nëse ai përnjëmend mendon se populli ende vazhdon që të mbështesë, unë e ftoj që t’i shpallim zgjedhjet qysh sot. E kemi ftuar qe gjashtë muaj; po unë e di që edhe ai e di se sot situata në opinion është krejt ndryshe. Ndoshta edhe ai nuk e di krejt mirë, sepse ai nuk është me qytetarët. E unë jam me qytetarët, unë besoj që kryeministrin Kurti qytetarët nuk kanë mundur as ta shohin edhe kur ka dalë në terren, sepse nuk ka mujt me pa nga rrethimi i bodigardëve nga 15 ose 20 që i ka. Por, gjatë gjithë këtij viti kam qenë pranë qytetarëve, i kam dëgjuar brengat e hallet e tyre, edhe kritikat e kërkesat e tyre. Edhe për ne si opozitë deri në muajin dhjetor, në 12 komuna kam qenë dhe kam takuar, jo njerëz partiakë, por qytetar të rëndomtë, ndërmarrës, aktivistë, organizata joqeveritare, punëdhënës, por edhe punëtorë. Kam takuar punëtorë shëndetësorë, mësimdhënësit, kam takuar fermerë të ndryshëm në vise të ndryshme dhe unë sot besoj që secili prej tyre ka nevojë që të kthehet tek kutitë e votimit për ta dhënë verdiktin për këtë qeveri, por edhe për ta dhënë verdiktin për këtë opozitë. Ne jemi të gatshëm, ne jemi të interesuar dhe ne besojmë që çdo ditë që vazhdon kjo qeveri me qenë në pushtet është ditë e humbur për Kosovën dhe kosto e madhe për secilin qytetar.
Sikur të ishin punët mirë në këtë vend nuk kishin ikur 200 mijë qytetarë prej qeverisjes së Albin Kurtit. Nëse vërtet këta ministra e ky kryeministër besojnë që kanë bërë punë të mira, a munden me na dhënë përgjigje pse e kanë lëshuar vendin 200 mijë njerëz. Nuk po flasim më vetëm për nevojtarët, nuk po flasim më për të papunët, po flasim për profesionistë, po flasim për arkitektë e për mjekë, për infermierë e për secilin profesion. Dhe jo vetëm nga viset rurale, por edhe viset urbane, dhe jo vetëm në një rajon, po anembanë Kosovës. Pra kryeministri nëse vërtet beson që ka bërë punë të mira besoj që ka përgjigje pse atëherë po ikin njerëzit prej punëve të mira. Absurditetet e tij janë të jashtëzakonshme. Para disa ditësh në dhjetor dolën dhe thanë që ekonomia e Kosovës është e treta në Evropë. As fëmijët nuk mund ta besojnë një gjë të tillë. Sepse ekonomia e Kosovës duke qenë edhe ashtu e vogël, me rritjen 3.5 për qind, ndoshta mund të krahasohet me Ukrainën, e cila është në luftë, por ka mbështetje financiare ndërkombëtare masive. Mund të krahasohet me një shtet si Moldavia që gjithmonë ka qenë aty-këtu me neve, po nuk mund të krahasohet as me shtetet e rajonit. Kjo i bie që jemi më mirë se Shqipëria, kjo i bie që jemi më mirë se Mali i Zi, kjo i bie që jemi më mirë edhe se Sllovenia e si Kroacia. Por mendoj se është një absurditet në vete, por që është pjese e propagandës qeveritare e cila fatkeqësisht vazhdon që të jetë shumë aktive.
EO: Do të doja t’ju pyesja për Draftin e Asociacionit, ndoshta fjala më e përmendur në vitin që po lëmë pas? Njëherë u tha nga kryeministri Kurti se e ka pranuar marrëveshjen e Ohrit (pjesë e të cilës është dhe Asociacioni); më pas jo, pa u nënshkruar nga Vuçiqi. Pastaj Osmani tha se do të ulemi ta shkruajmë draftin me amerikanët, por nuk u bë. Edhe Konjufca i ka ndërruar deklaratat. A e ka pranuar Kosova Asociacionin? Mos po duan të shkohet në zgjedhje?
Krasniqi: Unë mendoj që krerët e shtetit duhet që të koncentrohen njëherë dhe ta diskutojnë mes vete, sepse do të ishte jashtëzakonisht e papërgjegjshme dhe e padrejtë nëse krejt këtë kakofoni dhe këto mosmarrëveshje e qëndrime të ndryshme janë duke i bërë në mënyrë të organizuar. Në njërën anë, presidentja thoshte se duhet ta shkruajmë draftin vetë; kryeministrit thoshte jo po e presim draftin e këtyre. Një herë thoshte kryeministri “i kemi dërguar komentet”, pastaj del zv.kryeministri Bislimi thotë “jo nuk do të dërgojmë komente”. Një ditë del kryetari i Kuvendit thotë “e lexova shpejt e shpejt dhe ish në pajtim me Kushtetutën”, sikur me qenë ekspert kushtetues. Tash së voni doli tha jo nuk bën me e bë atë Asociacion se është shumë i keq. Kryeministri tash i kishte rënë në mend se “mirë është që ta shkruaj unë vetë një draft”. Kjo është një lojë për të cilën nuk kanë më hapësirë. Nëse kryeministri Kurti vërtet ka pasur mbivlerësim për vetveten që taktizimet e tij do t’i ndihmojnë Kosovës, kjo tashmë është evidente që vetëm dëme na kanë sjellë. Por edhe atë hapësire që ka menduar që ka për taktizim tashmë nuk e ka. E ka të minimizuar totalisht, sepse ai nuk do të ketë rrugëdalje, përveç të marrë veprime dhe vendime, në javët e ardhshme. Nuk e pret bota Albin Kurtin me bë hajgare me ta, siç ka bërë deri tash. Po as qytetarët e Kosovës nuk lejojnë me me ba hajgare me ta, siç ka bërë deri tash. Nuk mundesh sot me thënë “e pranova”, nesër “nuk e pranova”, sepse nuk funksionon bota ashtu, e aq më pak partneritete. Unë e thashë që në fillim, ne e kemi humbur respektin e partnerëve të rëndësishëm të Kosovës, pikërisht për shkak të këtyre arsyeve. Sepse njerëzit dëshirojnë që të kenë një parashikueshmëri në raporte dhe me Kurtin nuk e kanë një gjë të tillë. Andaj sot e kësaj dite nuk e kanë të qartë, as ai si duket, po as qytetarët dhe as partnerët, a e ka pranuar Albin Kurti Draftin e Statusit, a do ta aprovojë në qeveri dhe a do të dërgojë për opinion në Gjykatën Kushtetues. Kjo është ajo për çka duhet të japë përgjigje. Unë besoj që kjo do të ketë ndikim edhe tek veprimet që ndërlidhen me zgjedhjet e parakohshme për të cilat unë jam i bindur që ne do t’i mbajmë në vitin 2024.
EO: Kur po pritni të mbahen zgjedhjet e reja parlamentare? Verës?
Krasniqi: Nuk mund ta them me saktësi, sepse pa dyshim që një ndikim të madh do ta ketë edhe vetë kryeministri, sepse ai mundet të na dërgojë në zgjedhje kështu befasishëm, me një dorëheqje, edhe pse nuk e parashoh dorëheqjen e tij. Dhe kjo është arsyeja që nga korriku ne kemi kërkuar që ta shpërndajmë Kuvendin për t’ia lehtësuar edhe atij, për t’ia ruajtur egon e sforcuar dhe për të shkuar në zgjedhje përmes shpërndarjes së kësaj legjislature. Por, nuk mund ta them me siguri a mund të mbahen në qershor apo në tetor, më herët apo më vonë. Por jam i bindur që viti i ardhshëm, tashmë po shihet edhe nga veprimet e qeverisë dhe nga diskursi i tyre, nga narracioni politik që po e përdorin, besa edhe tubimet elektorale që i patën në fund të dhjetorit që edhe VV-ja, edhe kryeministri, po përgatiten për zgjedhje. Ky është lajm i mirë. Sepse unë besoj që rikthimi tek kutit e votimit e tek verdikti qytetar do të japin një mundësi të re Kosovës për ta hequr këtë qeveri të papërgjegjshme nga pushteti dhe për t’i dhënë Kosovës një opsion alternativ për një qeverisje të përgjegjshme, e cila do të kthejë Kosovën në binarët e zhvillimit dhe të integrimit dhe që do të udhëhiqet nga ne.
EO: E përmenda si mundësi që zgjedhjet të mbahen verës, sepse ka disa parashikime, analiza, që Kurti dëshiron që zgjedhjet të mbahen kur mërgata vjen për pushime në Kosovë, duke llogaritur në votën e tyre…
Krasniqi: Taktizimet edhe mund të ndodhin. Por, një gjë duhet ta kuptojmë: Mërgata është pjesë e pandashme e trungut të Kosovës, si popull, si qytetarë dhe si njerëz me kontribute të mëdha, edhe në kuptimin ekonomik, edhe politik; dhe unë besoj që edhe mundësia që ata ia kanë dhënë Albin Kurtit është e njëjtë si mundësia që ia kanë dhënë edhe qytetarë e Kosovës. Pavarësisht që ata nuk jetojnë gjithë kohën në Kosovë, duke ardhur shpesh e shohin që ky vend ka stagnuar, që ky vend nuk po ecën përpara. E shohin nga familjet e tyre, jeta e të cilëve është rënduar. E shohin edhe nga fakti që vazhdojnë të iu ndihmojnë edhe financiarisht familjeve të tyre. Sepse nëse dikush ka menduar që kjo barrë do të ju lehtësohet për shkak të politikave të duhura të Albin Kurtit, fatkeqësisht ajo barrë ndoshta vetëm sa është rënduar, sepse jeta e qytetarëve tanë është renduar nga ngritja enorme e çmimeve dhe kostos së jetës në përgjithësi. Unë nuk e shoh aspak problematike… PDK-ja ka pasur një riorganizim shumë inkurajues në shumicën e shteteve evropiane dhe unë besoj që kemi arritur që të qasemi në një formë krejtësisht tjetër, shumë më të afërt dhe më të hapur ndaj bashkatdhetarëve tanë anembanë BE-së dhe në shtete të tjera.
EO: Në këtë fundvit nuk mundemi pa i përmendur edhe ish-krerët e UÇK-së dhe të PDK-së që ndodhen në Hagë. Është njëfarë bindje, sidomos te një pjesë e votuesve tradicionalë të PDK-së që pa u kthyer Thaçi e Veseli, PDK-ja nuk kthehet në pushtet. Sa janë reale këto pritje? Dhe një koment, si e patë ju përfshirjen e tyre, në sondazhet e fundit të porositura, si personalitete që po i bëjnë opozitë Qeverisë Kurti, megjithëse ata ndodhen qe tri vjet në Hagë?
Krasniqi: E para e punës është krejtësisht e padrejtë pavarësisht qëllimeve, që ish-presidenti Thaçi e ish-kryetari Veseli, të përfshihen në diskutimet ditore politike. Unë përfshirjen e tyre edhe në sondazh nuk dëshiroj ta shohë domosdoshmërisht me sherr që është për të dëmtuar votën e PDK-së, duke e ndarë në tri shtylla të ndryshme, sepse në fund të fundit ato janë votat tona, kumulativi i tyre përsëri na nxirrte si partinë më të rëndësishme opozitare. Gjë që është evidente pa dyshim. Përfshirja e tyre në diskutimin në diskursin politik është e papranueshme. Si Thaçi, si Veseli, si Selimi e Krasniqi, dhe të gjithë të tjerët që ballafaqohen me betejën e fundit për historinë e Kosovë në Hagë, për drejtësinë e vendit tonë, e popullit tonë, në mënyrë të veçantë të luftës çlirimtare të UÇK-së, duhet ta kenë mbështetjen e gjithë qytetarëve, sepse nuk janë atje vetëm personalisht. Nuk janë ata atje vetëm si individë, ata emra të përveçëm kanë, por atje janë duke përfaqësuar komplet historinë më të re të vendit tonë dhe pjesën më të lavdishme të kësaj historie. Vërtet unë jam i inkurajuar për mbështetjen e përgjithshme. Ne, siç e dini, gjatë vitit 2023 një ditë para fillimit të gjykimit, kemi qenë pjesë e organizimit të një marshi për drejtësi, i cili ishte marshi më i madh që është mbajtur në historinë e Kosovës, pas pavarësisë së paku; ku kanë qenë rreth 100 mijë qytetarë. Për mua ka qenë inkurajim i jashtëzakonshëm, sepse është dëshmuar mbështetja qytetare pa dallime dhe përtej bindjeve partiake.
Ajo që për neve është me rëndësi dhe për ta në veçanti, duke qenë se unë duke i pasur edhe miq edhe eprorë në të kaluarën, duke i takuar sa më shpesh që mundem me vizitat e mia në Hagë; fokusi i tyre sot është triumfi i drejtësisë dhe lirimi e kthimi pranë familjeve të tyre. PDK-ja e ka dëshmuar, po e quaj madhështinë e saj, po e humbi pak modestinë, edhe tek zgjedhjet lokale. Ne i kemi fituar zgjedhjet lokale pas një “cunami politik” të fitores së Albin Kurtit me mbi 50 për qind. Dhe kemi arritur që jo vetëm të rikthejmë disa prej komunave të rëndësishme, por edhe disa më të vogla dhe t’i mirëmbajmë edhe ato që i kishim.
EO: A jeni të kënaqur me qeverisjen lokale të PDK-së nëpër komunat ku udhëhiqni? Bashkëqeverisja në Prishtinë, si po ecën? Pamë së fundi një mospajtim në lidhje me faljen e tatimit në pronë…
Krasniqi: Unë mendoj që si çdo bashkëqeverisje zakonisht ka sfida, ka sfida sepse ndonjëherë nuk përputhen prioritetet. Ndoshta ndonjëherë prioritet i njërës palë nuk është prioritet i palës tjetër, ka situata të tilla. Por, në përgjithësi është herët që ta bëjmë një vlerësim final dhe duke mos i pasur as ndoshta detajet e plota për Prishtinën.
Për sa i përket qeverisjes lokale nga ana e kryetarëve të PDK-së, unë jam jashtëzakonisht i kënaqur, jam jashtëzakonisht krenar dhe mendoj se ata kanë arritur suksese përkundër mbështetjes së munguar të Qeverisë së Kosovës. Duke pasur parasysh edhe faktin tashmë të fundit që edhe nga buxheti i viti 2024 i kanë përjashtuar shumicën e komunave ku nuk ka fituar VV-ja, duke mos ju ndarë as edhe një cent për projektet te reja kapitale; përkundër kësaj mungese të mbështetjes, dhe ndëshkimit nga ana e qeverisë, e tentimi për t’iu përzier në punët e brendshme, siç ishte rasti me faljen e tatimit në pronë. Kryetarët nga radhët e PDK-së, qeverisjet tona lokale, bashkë me partnerët e tjerë, kanë arritur që të jenë modeli më i mirë i qeverisjes sot në Kosovë. Unë besoj që këtë model të qeverisjes, ne dëshirojmë ta replikojmë e ta kthejmë edhe në nivelin qendror në qeverinë tonë të ardhshme. Sepse është një model shumë konkret, që ka në qendër qytetarët; një model të qeverisjes që kryen punë, që e mban fjalën, dhe që ju shërben qytetarëve. Andaj në të gjitha këto komuna vërtet janë bërë punë të jashtëzakonshme. Unë kam qenë dhe kam parë drejtpërdrejt transformimin e këtyre qyteteve dhe të komunave, që po bëhet me politikat vërtet vizionare dhe konkrete në shërbim të qytetarëve.
EO: Viti 2023 do të mbahet mend edhe për dërgimin e shumë ligjeve në Gjykatën Kushtetuese, për shumicën e të cilave Gjykata ka konstatuar se ka pasur shkelje nga Qeveria? Na kujtohet, dikur Kurti në opozitë thoshte se ata që e shkelin Kushtetutën janë super-kriminelë, ndërsa tani kur Qeveria dhe ministrat e vet e shkelin Kushtetutën, sikur po arrin ta bindë publikun, se faji është te gjykatat që po duan ta ndalin reformat. Pse opozita nuk po arrin t’i shndërrojë këto në fitore elektorale, të themi ashtu?
Krasniqi: Mirë do të ishte ta pyesim Kurtin a beson ende në thënien e tij: “Ai që e shkel ligjin është kriminel, e ai që e shkel Kushtetutën është super-kriminel”, sepse nëse vërtet beson çka s’e ka keq, atëherë ky është super-kriminel në shkallën e tetë a të dhjetë, a nuk e di sa herë e ka shkelur Kushtetutën tashmë. PDK-ja ka qenë shumë vigjilente dhe ka qenë konsekuente në ndalimin e shkeljeve Kushtetuese, të cilat në vazhdimësi i ka bërë kjo qeveri, e sidomos në të ashtuquajturën reformë në drejtësi, përmes së cilës ka dashur që ta shkatërrojë drejtësinë në Kosovë, e ta rindërtoj atë për interesat e veta për ta kapur e ndikuar 100 për qind. Nuk e kemi lejuar një gjë të tillë, e kemi bërë ne sepse kemi qenë të bindur në të drejtën tonë, në të drejtën e qytetarëve dhe në anën e drejtë të Kushtetutës së Kosovës. Ka qenë një prej platformave tona opozitare, ashtu siç ka qenë platformë tjetër parlamenti, ashtu siç ka qenë platformë tjetër terreni, ashtu siç është platformë tjetër qeverisja lokale dhe komunikim i drejtpërdrejtë me qytetarët, pse jo edhe përmes medieve. Ne kemi qenë aktivë gjatë gjithë këtij viti, kemi pasur të gjitha potencialet tona në funksion të kritikës kundër qeverisë, por po ashtu edhe në ofrimin e alternativave konkrete. Viti 2024 do të jetë kulminacioni i gjitha këtyre angazhimeve, sepse do të jetë vit zgjedhor. Dhe, si PDK ne tashmë jemi duke i bërë gati edhe veprimet që na presin për të konsoliduar jo vetëm radhët tona, por për të qenë përtej PDK-së, afër qytetarëve, për të marrë besimin tyre dhe për ta rikthyer qeverisjen që sot po i mungon Kosovës.
EO: Kur i përmendët zgjedhjet, më ra ndërmend që PDK-ja e ka pasur një kabinet nën hije. A është duke funksionuar?
Kabineti për qeverisje të mirë është duke e kryer punën e vet. Ka pasur arsye konkrete pse është dashur që një pjesë të dikastereve t’i shtyjmë për vitin zgjedhor. Por ajo që është e rëndësishme është se në secilën prej organeve edhe forumeve të PDK-së ka një energji të jashtëzakonshme, ka një fryme e cila është tepër e rëndësishme për mobilizimin e ardhshëm që na pret dhe për zgjedhjet të cilat unë besoj do të mbahen shpejt në vitin 2024.
EO: Migrimi? Çfarë prisni të ndodhë pas 1 janarit, pas heqjes së vizave për qytetarët e Kosovës?
Unë nuk e shoh shumë problem 1 janarin 2024 dhe lëvizjen pa viza. Kjo është e mirëseardhur, është e vonuar e stërvonuar dhe mirë që ka ndodhur përfundimisht. Ajo që ka qenë problematike është largimi i qytetarëve para liberalizimit të vizave, sepse lëvizja në zonën e Shengenit, vizita për të parë mundësitë, qofshin ato edukative, ndoshta edhe të punësimit, është më pak problematike dhe e dëmshme se fakti që na në dy vitet e fundit, apo dy vitet e gjysmë qeverisje të Kurtit e kanë lëshuar Kosovën mbi 200 mijë qytetarë. Shumica prej tyre me kontrata të punës, shumica prej tyre profesionistët, prej inxhinierëve, arkitektë e deri te mjekë, e cilido profesion tjetër. Pra kjo për mua është shqetësimi më i madh, sepse ka ndikuar që të ketë vërtet një shpopullim në disa prej viseve të Kosovës e që është edhe më shqetësuese që për herë të parë e kemi parë një largim të njerëzve nga gjithat llojet e demografie, pra jo vetëm nga zonat rurale, por edhe nga zonat urbane, jo vetëm nga një rajon por nga të gjitha rajonet; jo vetëm nga të papunët e nevojtarët, por edhe nga profesionistët dhe të punësuarit. Ka qenë pra një largimi, i cili mu ma ka dhënë një frikë që ndoshta është një humbje e besimit në mundësitë që i ofron Kosova. Përgjegjësia e qeverisë është absolute në këtë drejtim. Ata nuk mund t’i shmangen kësaj përgjegjësie dhe kjo është arsye që kemi thënë që nëse kryeministri mendon vërtet në propagandën e tij, nëse ai beson që ka bëre punë të mira, që njerëzit sot jetojnë ma mirë, a mundet me na dhënë përgjigje pse njerëzit po ikin prej këtyre të mirave. Pse ikin 200 mijë qytetarë të Kosovës, nëse kaq mirë e ka bërë jetën këtu, nuk ka përgjigje! Përgjigjja e vetëm do të jenë kutit e votimit dhe ne presim sa më shpejt caktimin e datës për zgjedhjet e reja.
EO: Ju faleminderit për kohën tuaj dhe gëzuar festat!
