Deputetët e Kuvendit të Kosovës kanë miratuar në lexim të dytë buxhetin për vitin 2024 në vlerë prej 3 miliardë e 314 milionë euro.
Ligji mbi ndarjet buxhetore ka kaluar në lexim të dytë me mbështetjen e 63 deputetëve.
Në votim nuk kanë marrë pjesë deputetët e tri partive opozitare, PDK, LDK dhe AAK. Opozita nuk kishte marrë pjesë as në votimin e parë të këtij Projektligji në muajin nëntor.
Sot, në seancën që ka zgjatur më shumë se 8 orë, deputetët kanë shqyrtuar 64 amendamente të këtij Projektligji.
Më 16 nëntor deputetët e Kuvendit të Kosovës miratuan në parim Projektligjin mbi ndarjet buxhetore për vitin 2024.
Buxheti i Republikës së Kosovës për vitin 2024 pritet të jetë 3 miliardë e 314 milionë euro.
Ky buxhet është mbi 100 milionë euro më i lartë në krahasim me buxhetin e këtij viti.
