Mirush Kabashi ( 17 prill 1948 – 5 dhjetor 2023) lindi në Shkodër kurse është rritur në Durrës. Me origjinë ishte nga Gjakova. Ai ishte aktor i rreth 100 roleve, në teatër dhe filma. Shpesh ka qenë edhe prezantues i aktiviteteve të shumta artistike. Gjithashtu, Kabashi është cilësuar si një nga interpretuesit më të mëdhenj të poezisë në Shqipëri. Ai ka dhënë një kontribut të madh në filmografinë shqiptare.
Interpretimi dhe ngjyrimi emcional i roleve, e veçojnë Mirush Kabashin. Personazhet e mishëruara nga Kabashi bien në sy për origjinalitetin, për elegancën, duke frymuar karaktere me ndryshime të ndjeshme nga njëri te tjetri, të përzgjedhur me mençuri dhe intuitë.
Mirush Kabashi, në fund të vitit 2014 u nderua me titullin e lartë “Nderi I Kombit”, kurse më parë kishte titujt “Artist i Merituar” dhe “Mjeshtër i Madh i Punës”
Në Kosovë, mori famën dhe zemrat e kosovarëve me interpretimin e “Poemit kosovar” të Mitrush Kutelit, në një kohë aspak të lehtë për Kosovën, e padyshim që edhe interpretimi i këtij poemi në një kohë të tillë ishte i vështirë. Ai entuziazmoi të gjithë sallën, që ishte e stërmbushur, duke ngritur në këmbë të gjithë e duke ngjallur ndienjat patriotike tek ta.
